İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 272 Hüküm no: 225 Orijinal metin no: [86-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Enderun’dan Osman Ağa’nın, kardeşi Mehmed Ağa’ya ait olan para ve altınları harcadığı yolunda Melkon v. Artin hakkındaki iddialarını ispatlayamadığı Altın bey‘i [Ma‘rûz] Medîne-i Manisa ahâlisinden derûn-ı arzuhâlde ismi mezkûr mukaddemâ çiftlik Kethudâsı Mehmed Ağa b. Hüseyin b. Abdullah’ın li-ebeveyn er karındaşı ve tarafından husûs-ı âti’l-beyânda vekîl olduğu es-Seyyid Ali Efendi b. es-Seyyid Osman ve Receb Ağa b. Mustafa nâm kimesneler şehâdetleriyle sâbit olan Enderûn-ı hümâyûn hademesinden Osman Ağa şifâhen sâdır olan fermân-ı âlîlerine imtisâlen bi’d-defa‘ât Çarşamba günleri huzûr-ı hazret-i Fetvâ-penâhî’de ma‘kūd meclis-i şer‘-i münîrde arzuhâl eden sarrâf hizmetkârı Melkon v. Artin zimmî muvâcehesinde mersûm Melkon zimmî bin iki yüz elli dört senesi Recebi’l-müreccebi gurresinde medîne-i mezkûrede Veli oğlu Ahmed Ağa kahvehânesinde karındaşım müvekkilim mezbûr Mehmed Ağa yedinden ve mâlından cem‘an iki bin iki yüz yetmiş guruşluk yüz on üç aded yirmilik memdûhiye altını ve bir onluk memdûhiye altını nısfiyesi iktirâz ve kabz ve umûruna sarfla istihlâk edip ol-vechile zikr olunan altınlar müvekkilim mezbûrun zimm-i mesfûr zimmetinde alacak hakkı <> olmağla misillerini hâlâ taleb ederim deyü bi’l-vekâle ba‘de’d-da‘vâ ve’l-inkâr müdde‘î-i vekîl-i mezbûr da‘vâ-yı mezkûresini bir vechile isbât edemeyip talebiyle mersûm Melkon zimmîye bi’l-muvâcehe ber-nehc-i şer‘î yemîn verilmeğin mûcebince müdde‘î-i vekîl-i mezbûr Osman Ağa da‘vâ-yı mezkûresiyle mesfûr Melkon zimmîye bilâ-beyyine mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî 11 S sene 1258