İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 273 Hüküm no: 226 Orijinal metin no: [87-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hancı Mehmed Ağa’nın boşadığı karısı Havva’ya olan borcunu ödemesi 6124,5 [guru]ş hüküm ve eşyâ ibrâsı Ma‘rûz Mu‘arrefetü’z-zât Havva Hatun bt. Abdullah bâb-ı âlîlerine takdîm eylediği arzuhâline sâdır olan fermân-ı âlîlerine imtisâlen Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde zevc-i sâbıkı arzuhâl-i mezkûr derûnunda ismi muharrer Hancı es-Seyyid Mehmed Ağa b. Mehmed muvâcehesinde mâlım olup hîn-i müfârakatimizde mezbûr es-Seyyid Mehmed Ağa yedinde kalmağla el-hâletü hâzihî bana teslîme müte‘ahhid olduğu beş yüz guruş kıymetli bir zümrüd yüzük ve yedi yüz guruş kıymetli bir hilâlî pesen-dîde sâ‘atimden mâ‘adâ mezbûr es-Seyyid Mehmed Ağa ile zevciyet beynimizde kāime iken bin iki yüz elli senesi Muharremi’l-harâmı hilâlinde Mısr-ı Kāhire’ye mâ‘an gidecek olduğumuzda İstanbul’da Kumkapı dâhilinde Çadırcı Ahmed Çelebi mahallesinde kâin bi’l-icâreteyn mutasarrıfe olduğum bir bâb menzili emr-i vekîlimle âhara beş bin guruş mukābelesinde bi’l-vekâle fâriğ olmağla bedeli olup mefrûğun-bih-i merkūmun benim için teberru‘an verip mezbûr es-Seyyid Mehmed Ağa dahi bi’l-vekâle benim için makbûzu olan meblağ-ı mezkûr beş bin guruş ve mâlımdan bi’l-vekâle âhara bey‘ ü teslîm eylediği üç bin vakıyye leben ve iki yüz vakıyye evânî-i nühâsiye ve kezâlik iki yüz vakıyye penbe ve kıtık memlû altmış mavi ve yeşilli müsta‘mel çatma yasdık ve beş müsta‘mel Selanik keçesi ve bir müsta‘mel çuka ferâce ve bir sîm gülâbdân ma‘a buhurdân ve bir tombak? gülâbdân ma‘a buhurdân ve bir sevâî entari ve on iki köhne yasdık gılâfı ve bir taş havan ve bir tennûr ve bir dolab ve bir hamur tahtası ve bir köhne kapı perdesi semenlerinden dahi makbûzu olan yirmi bin guruş ki cem‘an yirmi beş bin guruşu bana vermeyip yedinde kalmağla hâlâ taleb ederim deyü da‘vâ ettikde mezbûr es-Seyyid Mehmed Ağa dahi cevâbında zikr olunan zümrüd yüzük ve sâ‘at ber-vech-i muharrer müdde‘iye-i mezbûrenin mâlı olup yedinde kalmağla kendine teslîme ta‘ahhüd ve menzil-i mezkûr ferâğı bedelinden ancak dört bin iki yüz elli guruş minvâl-i muharrer üzere kabz eylediğini ve müdde‘iye-i mezbûrenin ancak beş yüz yirmi altı vakıyye yün ve on üç vakıyye evânî-i nühâsiye ve otuz yedi vakıyye penbe ve kıtık memlû on iki mavi ve yeşilli müsta‘mel çatma yasdık ve iki müsta‘mel Selanik keçesi ve bir müsta‘mel çuka ferâce ve bir tonbuk gülâbdân ma‘a buhurdân ve on iki köhne yasdık gılâfı ve bir taş havan ve bir tennûr ve bir dolab ve bir hamur tahtası ve bir köhne kapı perdesini bi’l-vekâle âhara ancak bin sekiz yüz yetmiş dört buçuk guruşa bey‘ u teslîm edip semen-i merkūm bin sekiz yüz yetmiş dört buçuk guruşu kabz eylediğini ikrâr ve müdde‘iye-i mezbûrenin ber-vech-i muharrer ziyâde müdde‘âlarını inkârından mâ‘adâ minvâl-i muharrer üzere cem‘an makbûzum olan altı bin yüz yirmi dört buçuk guruşu dahi müdde‘iye-i mezbûrenin emriyle Kāhire-i mezkûreye gider iken bâ-defter-i müfredât umûr-ı ma‘lûmesine harc ü sarf etmiş idim deyü eylediği def‘ini dahi müdde‘iye-i mezbûre Havva Hatun inkâr etmekle tarafeyn ber-vech-i muharrer def‘ ü da‘vâlarını isbâtdan izhâr-ı acz birle her biri istihlâf etmeleriyle def‘-i mezkûr husûsunda müdde‘iye-i mezbûre Havva Hatun’a ve müdde‘iye-i mezbûrenin ber-minvâl-i muharrer ziyâde müdde‘âlarında mezbûr es-Seyyid Mehmed Ağa’dan her birine başka başka bi’l-muvâcehe vech-i şer‘î üzere yemîn verilmeğin mûcebince tarafeyn vech-i meşrûh üzere def‘ ve da‘vâlarıyla âhara bilâ-beyyine mu‘ârazadan ba‘de’l-men‘ mezbûr es-Seyyid Mehmed Ağa’nın ikrârıyla lâzım gelen meblağ-ı mecmû‘-ı mezkûr altı bin yüz yirmi dört buçuk guruşu müdde‘iye-i mezbûre Havva Hatun’a def‘ ü teslîme mezbûr es-Seyyid Mehmed Ağa’ya tenbîh olunduğu İstanbul Mahkemesi’nden huzûr-ı [âlîlerine i‘lâm olundu] Fî 4 S sene [12]58