İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 276 Hüküm no: 229 Orijinal metin no: [88-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa’nın Ebubekir Ağa’daki alacaklarını tahsil ettiği Ahz u kabz [Ma‘rûz] <> Cabbarzâde Kapıkethudâsı Mustafa Beyzâde dergâh-ı mu‘allâ kapıcıbaşılarından Mehmed Sadık Bey’in mu‘takı ve mukaddemâ hazînedârı Osman Ağa b. Abdullah meclis-i şer‘-i münîrde mîr-i mûmâ-ileyhin mukaddemâ Kethudâsı sâbıkā Burdur Karaağacı ve mülhakātı kazâların muhassılı bâ‘isü’l-i‘lâm el-Hâc Ebûbekir Ağa b. Osman’ın sulbî kebîr oğlu ve tarafından husûs-ı âti’l-beyânda vekîl olduğu İsmail Ağa b. Mustafa ve Zeynelabidin Ağa b. Maksud nâm kimesneler şehâdetleriyle sâbit olan hâlâ Mahkeme-i Ticâret Başkâtibi Mehmed Yüsrî Efendi muvâcehesinde bin iki yüz kırk yedi senesi hilâlinde mûmâ-ileyh Mehmed Sadık Bey’in ben hazînedârı ve müvekkil-i mezbûr el-Hâc Ebûbekir Ağa dahi Kethudâsı iken müvekkil-i mezbûr el-Hâc Ebûbekir Ağa mâlım olup tarafımdan bi’l-vekâle âhara bey‘ ü teslîm eylediği bâ-defter-i müfredât eşyâ-i ma‘lûme semenlerinden kabz eylediği iki bin guruşun bin guruşunu mukaddemâ ve bâkī beş yüz guruşunu dahi bu def‘a bana def‘ ü teslîm ben dahi yedinden ahz u kabz edip fî-mâ ba‘d müvekkil-i mezbûr el-Hâc Ebûbekir Ağa yed ve zimmetinde aslâ ve kat‘a hakkım ve alacağım kalmamağla bi’l-cümle husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden tarafeynden her birimiz âharın zimmetini ibrâ-i âmm-ı sahîh-i şer‘î ile <> bi’l-asâle ve bi’l-vekâle ibrâ ve iskāt ve her birimiz ber-vech-i muharrer âharın ibrâsını kabûl edip bu vechile külliyen kat‘-ı münâza‘a eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu] Fî 9 S sene [12]58