İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 277 Hüküm no: 230 Orijinal metin no: [88-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf kasap dükkânı gediği hisselerinin satışı Kasab Tavukpazarı’nda [Ma‘rûz] Cennet-mekân firdevs-âşiyân Sultan Abdülhamid Han —aleyhi eltâf-ı Rabbihi’l-Mennân— hazretlerinin evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla yedinci selhhâneye merbût kasab dükkânlarından İstanbul’da Tavukpazarı ortasında kâin ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmenin südüs hissesine bâ-temessük-i mütevellî bi’l-icâreteyn münâsafeten mutasarrıfeler olan Âişe ve Ümmügülsüm bintey-i Mustafa b. Salih nâm hatunlar taraflarından husûs-ı âti’l-beyânda vekîlleri olduğu zâtlarını ârifân Abdülkerim b. Mehmed ve Hafız Mehmed Emin nâm kimesneler şehâdetleriyle sâbit olan Mehmed Salih b. Ali meclis-i şer‘-i münîrde bâ‘isü’l-i‘lâm kasab el-Hâc Hasan Ağa b. Halil muvâcehesinde hâlâ Kassâbân müdîri es-Seyyid Mehmed Ali Bey ve sâir mazbûtü’l-esâmî kasab ustaları hâzır oldukları hâlde bi’l-vekâle takrîr-i kelâm edip müvekkilelerim mezbûretân Âişe ve Ümmügülsüm hatunlar ber-vech-i muharrer mutasarrıfe oldukları südüs âlât-ı gedik-i mezkûru hüsn-i rızâ ve tayyib-i hâtırları ve ferâğ-ı kat‘î ile mezbûr el-Hâc Hasan Ağa’ya bedel-i ma‘lûm ve makbûz ve müstehlek mukābelesinde bâ-re’y-i mütevellî ferâğ ve tefvîz ve teslîm ol dahi ber-vech-i muharrer tefevvüz ve tesellüm ve kabûl ve hisse-i tevzî‘ini müdîr ve kasab ustaları ma‘rifetiyle almağa ta‘ahhüd edip fî-mâ ba‘d südüs âlât-ı gedik-i merkūm mezbûr el-Hâc Hasan Ağa’nın hakk-ı tefevvüzü olup müvekkilelerim mezbûretânın aslâ ve kat‘a alâka ve medhalleri kalmamışdır deyü ba‘de’l-ikrâr ve’t-tasdîk gedik-i mezkûrun südüs hissesi fâriğetân-ı mezbûretân Âişe ve Ümmügülsüm hatunların ferâğlarından defter-i vakf-ı şerîfde mezbûr el-Hâc Hasan Ağa uhdesine kayd ve der-dest olan temessük-i mezkûr hâmişine zabt u tasarrufi’çün taraf-ı vakfdan tahrîr ve temhîr ve yedine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 23 M sene [12]58