İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 278 Hüküm no: 231 Orijinal metin no: [88-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf menzilin satışında meydana gelen ihtilafın giderildiği Menzil nizâ‘ına dâir [Ma‘rûz] Sâhib-i arzuhâl Mustafa Efendi b. el-müteveffâ Bezzâzistânî İsmail Ağa b. el-Hâc Ali bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî fazîletlü semâhatlü es-Seyyid Mehmed Emin Âsaf Beyefendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde zikri âtî vakıf menzile bâ-temessük-i mütevellî mutasarrıfe ve vaz‘-ı yedi mütehakkık olan derûn-ı arzuhâlde mezkûretü’l-ism Hanife Hanım’ın babası ve tarafından husûs-ı âti’l-beyânda vekîl-i sâbitü’l-vekâlesi el-Hâc İbrahim Ağa b. Mustafa muvâcehesinde dergâh-ı mu‘allâ kapıcıbaşılarından kezâlik derûn-ı arzuhâlde mezkûrü’l-ism Ali Ağa b. Mehmed hâzır olduğu hâlde bâ-[i]râde-i seniyye Hazîne-i Evkāf-ı Hümâyûn tarafından idâre olunan evkāfdan İstanbul’da Kırkçeşme civârında vâki‘ merhûm Hüsam Bey Câmi‘-i şerîfi Vakfı müsakkafâtından olup câmi‘-i şerîf-i mezkûr mahallesinde kâin ma‘lûmü’l-hudûd bir bâb vakıf menzil babam müteveffâ-yı mezbûr İsmail Ağa’nın hayatında bâ-temessük-i mütevellî bi’l-icâreteyn taht-ı tasarrufunda iken bin iki yüz elli dört senesi Cumâdelâhiresinin yedinci günü hâzır-ı mûmâ-ileyh Ali Ağa’nın mâlından ve yedinden iktirâz ve kabz ve umûruna sarfla istihlâk eylediği bin guruş deyni mukābelesinde ber-vech-i muharrer mutasarrıf olduğu menzil-i mezkûru hâzır-ı mûmâ-ileyhe vefâen bâ-re’y-i mütevellî ferâğ edecek olmağla menzil-i mezkûrun temessüğünü hâzır-ı mûmâ-ileyhe teslîm etmeğin ol dahi menzil-i mezkûru fuzûlî müvekkile-i mezbûre Hanife Hanım’a bâ-ma‘rifet-i mütevellî ferâğ ve tefvîz ettikden sonra hâzır-ı mûmâ-ileyhin ber-vech-i muharrer ferâğını mücîz olmadan babam merkūm bin iki yüz elli altı senesi Şevvâli’l-mükerreminin on beşinci günü vefât edip ol-vechile müvekkile-i mezbûre Hanife Hanım menzil-i mezkûra vaz‘-ı yed etmekle el-hâletü hâzihî menzil-i mezkûru babam müteveffâ-yı mezbûrun intikālinden mütevellîsi re’yi ile <> alıp tasarruf murâd eylediğimde mezbûre Hanife Hanım bî-vech mümâna‘at eder suâl olunup ber-vech-i muharrer mümâna‘atı men‘ ü def‘ olunmak murâdımdır deyü vakf-ı mezkûrun kāimmakām-ı mütevellîsi ecille-i ricâl-i Devlet-i aliyyeden hâlâ Evkāf Nâzırı atûfetlü Numan Mahir Beyefendi taraflarından mürsel vekilleri diğer el-Hâc İbrahim Ağa hâzır olduğu hâlde da‘vâ ettikde vekîl-i mezbûr el-Hâc İbrahim Ağa dahi cevâbında müdde‘î-i mezbûr Mustafa Efendi’nin babası müteveffâ-yı mezbûr Bezzâzistânî İsmail Ağa b. el-Hâc Ali hayatında ber-vech-i <> meşrûh mutasarrıf olduğu menzil-i mezkûru mârrü’z-zikr bin iki yüz elli dört senesi Cumâdelâhiresinin yedinci günü yedi bin beş yüz guruş bedel-i makbûz mukābelesinde kızım ve müvekkilem mezbûre Hanife Hanım’a bâ-re’y-i mütevellî kat‘iyyen ferâğ ve tefvîz etmekle menzil-i mezkûra vaz‘-ı yed edip hattâ sene-i sâbıkā yani bin iki yüz elli yedi senesi Zilhiccetü’ş-şerîfesinin yirminci günü târihiyle müverrah ve hâlâ Reisü’l-etibbâ-i hazret-i cihân-dârî ve Sadr-ı Rum-ı vâlâ-yı Rumeli devletlü atûfetlü Abdülhak Efendi hazretleriyle müfettiş-i mûmâ-ileyhin hâtemlerini hâvî Salı günü huzûr-ı hazret-i cenâb-ı Fetvâ-penâhî’de müfettiş-i mûmâ-ileyh ile bi’l-ma‘iyye mürâfa‘adan verip yedimde olan bir kıt‘a i‘lâm-ı şer‘î nâtık olduğu üzere müdde‘î-i mezbûr Mustafa Efendi husûs-ı mezkûru bi-aynihî müvekkilem mezbûreden yine kāimmakām-ı mütevellî vekîli mezbûr diğer el-Hâc İbrahim Ağa hâzır olduğu hâlde da‘vâ ettikde ben dahi kezâlik kızım mezbûre tarafından bi’l-vekâle minvâl-i meşrûh üzere da‘vâ-yı def‘ edip müdde‘î-i mezbûr Mustafa Efendi dahi def‘-i mezkûrumu ikrâr ve tasdîk etmekle mûcebince da‘vâ-yı mezkûresiyle kızım ve müvekkilem [89] mezbûre Hanife Hanım’a bî-vech-i şer‘î mu‘ârazadan men‘ dahi olunmuş idi deyü mazmûnu takrîr-i meşrûhuna mutâbık i‘lâm-ı mezkûru ibrâz ile bi’l-vekâle eylediği def‘ini ve mazmûn-ı i‘lâm-ı mezkûru bi-tamamihi tâyi‘an ve kat‘iyyen ikrâr ü i‘tirâf etmeğin mûcebince müdde‘î-i mezbûr Mustafa Efendi da‘vâ-yı mezkûresiyle müvekkile-i mezbûre Hanife Hanım’a kemâ-fi’s-sâbık bî-vech mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî 11 S sene 1258