İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 279 Hüküm no: 232 Orijinal metin no: [89-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci İbrahim Ağa’nın Hasna Kadın’dan satın aldığı cariyenin ayıplı olması yüzünden aralarında meydana gelen ihtilafın giderildiği 2000 [guru]ş sulh [Ma‘rûz] Sâhib-i arzuhâl Esirci İbrahim Ağa b. Ali meclis-i şer‘-i münîrde müteveffâ Esirci Osman Paşa halîlesi derûn-ı arzuhâlde mezkûretü’l-ism Hasna Kadın bt. Abdullah tarafından husûs-ı âti’l-beyânda vekîl olduğu zâtını ârifân Mehmed Hüsrev Ağa b. Abdullah ve Ahmed Ağa b. Ali nâm kimesneler şehâdetleriyle sâbit olan Hafız Yusuf Efendi b. Mustafa muvâcehesinde sene-i sâbıkā Şevvâli’l-mükerreminin yirmi üçüncü günü cemî‘ uyûbdan sâlime olmak üzere müvekkile-i mezbûre Hasna Kadın’dan sekiz bin iki yüz elli guruş semen-i medfû‘ ve makbûza iştirâ ve kabz eylediğim işbu hâzıratü bi’l-meclis orta boylu kara gözlü açık kaşlı on sekiz yaşında bir re’s Çerkes câriyenin beş aylık hamli zuhûr edip ol-vechile mu‘ayyebe ve câriye-i mezkûrenin hamli müvekkile-i mezbûrenin yanında iken mevcûd ve kadîm ve inde’t-tüccâr noksân-ı semen îcâb eder uyûbdan olmağla redd ü semen ve kabz-ı mebî‘ murâdımdır deyü teveccüh-i husûmet bulundukdan sonra tasaddî eylediğim da‘vâ-yı mezkûremden bâ-tavassut-ı muslihîn vekîl-i mezbûr Hafız Yusuf Efendi ile kat‘an-li’n-nizâ‘ iki bin guruş üzerine ba‘de-akdi’l-musâlaha ve’l-kabûl bedel-i sulh-ı mezkûr iki bin guruşu dahi bana edâ ve teslîme bi’l-vekâle ta‘ahhüd etmekle bedel-i sulh-ı merkūmdan mâ‘adâ bi’l-cümle husûs-ı mezkûra müte‘allika da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile bi’l-asâle ve bi’l-vekâle ibrâ ve iskāt ve her birimiz ber-vech-i muharrer âharın ibrâsını asâleten ve vekâleten kabûl edip bu vechile kat‘-ı nizâ‘ eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu] Fî 16 S sene 1258