İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 282 Hüküm no: 235 Orijinal metin no: [89-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hanım ile Zenneci Mehmed Arif Ağa’nın aralarındaki menzil satışı ve borç ödeme konularında sulh oldukları Menzil nizâ‘ı ve 6000 [guru]ş men‘ Ma‘rûz Sâhibe-i arzuhâl mu‘arrefetü’z-zât Şerife Fatıma Hanım bt. Hüseyin meclis-i şer‘-i münîrde zikri âtî vakıf menzile vaz‘-ı yedleri mütehakkık olan derûn-ı arzuhâlde mezkûrü’l-ism Zenneci Mehmed Ârif Ağa b. Ali ile zevcesi kezâlik mu‘arrefetü’z-zât Havva Hatun bt. el-Hâc Mehmed muvâcehelerinde zevcân-ı mezbûrâtdan [90] merkūm Mehmed Ârif Ağa’ya cihet-i karzdan üç bin beş yüz guruş ve bi-şarti’r-rücû‘ emrimle mâlından gāibetü ani’l-meclis Emetullah Hatun’a verdiği iki bin beş yüz guruş ki cem‘an altı bin guruş zimmetimde deynim olup ve bâ-irâde-i seniyye Hazîne-i Evkāf-ı Hümâyûn tarafından idâre olunan evkāfdan medîne-i Üsküdar’da Sultan Tepesi nâm mahâlde vâki‘ merhûme Hacce Hesna Hatun Mescidi Vakfı müsakkafâtından olup mescid-i mezkûr mahallesinde kâin bâ-temessük-i mütevellî bi’l-icâreteyn mutasarrıfe olduğum ma‘lûmü’l-hudûd bir bâb vakıf menzili bin iki yüz elli altı senesi Zilhiccetü’ş-şerîfesinin dokuzuncu günü bana on bin guruş bedel vermek şartıyla zevcân-ı mezbûrân Mehmed Ârif Ağa ve Havva Hatun’a ferâğ ve tefvîz onlar dahi vech-i muharrer üzere tefevvüz ve kabûl ve mütevellîsi dahi ol şartla izin ve temessük vermiş ise de lâkin bedel-i merkūmu bana vermediklerinden mâ‘adâ mezbûr Mehmed Ârif Ağa sâbıkā zevcin gāib ani’l-meclis Sâ‘atçi Mehmed Efendi’nin gāibetü ani’l-meclis Hatice Şüküre Hanım bt. Mehmed’e olan dört bin guruş deyni için mukaddemâ gāibe-i mezbûre bir takrîb mâlımdan dört bin guruşumu almağla meblağ-ı merkūm dört bin guruş ile zimmetinde alacağım olan meblağ-ı mecmû‘-ı mezkûr altı bin guruşu bedel-i ferâğ-ı merkūm on bin guruşa mahsûb ederim deyü zevcesi mezbûre tasdîkiyle îrâd eylediği kelâmı şer‘an müvecceh olmadığı kıbel-i şer‘den kendine tefhîm olunmağla el-hâletü hâzihî ben deynim olan meblağ mecmû‘-ı merkūm altı bin guruşu mezbûr Mehmed Ârif Ağa’ya edâ ve teslîme ol dahi zevcesi mezbûre Havva Hatun ile mâ‘an menzil-i mezkûru bâ-re’y-i mütevellî bana redd ü ferâğa tarafeynden her birimiz ta‘ahhüd edip bu vechile kat‘-ı münâza‘a eyledik deyü ikrâr ve tasâdıkları tescîl ve İstanbul Mahkemesi’nden huzûr-ı [âlîlerine i‘lâm olundu] Fî 14 S sene 1258