İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 283 Hüküm no: 236 Orijinal metin no: [90-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanko v. Yorgi’nin Anaştaş v. Petro’ya sattığı vakıf un değirmeni ve gedik değirmen âletleri hakkında yaptığı itirazın geçerli olmadığı Kasımpaşa’da değirmen nizâ‘ına dâir [Ma‘rûz] Uncu tâifesinden olup arzuhâl eden Yanko v. Yorgi zimmî Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i hatîrde zikri âtî vakıf değirmene bâ-temessük-i mütevellî mutasarrıf ve mülk gedik âlâtına dahi bâ-hüccet-i şer‘iye mâlik olmağla vaz‘-ı yedi mütehakkık olan derûn-ı arzuhâlde ismi mastûr tüccâr hizmetkârı Anaştaş v. Petro zimmî muvâcehesinde mahrûse-i Galata’ya muzâfe kasaba-i Kasımpaşa’da Câmi‘-i kebîr mahallesinde vâki‘ Debbâğhâne Meydanı’nda kâin merhûm Gāzi Kasım Paşa Vakfı müsakkafâtından ma‘lûmü’l-hudûd Dunik zimmî değirmeni demekle arîf dört horoslu bir bâb vakıf uncu değirmeni bâ-temessük-i mütevellî bi’l-icâreteyn taht-ı tasarrufumda ve derûnunda mevcûde beyne’l-esnâf gedik ta‘bîr olunur on altı re’s bârgir ve anda tâbi‘ sâir âlât-ı lâzıme-i ma‘lûme dahi bâ-hüccet-i şer‘iye yedimde mülk ve hakkım iken sene-i sâbıkā yani bin iki yüz elli yedi senesi Recebi’l-müreccebinin yirmi birinci günü ben ber-vech-i muharrer mâlik olduğum âlât-ı gedik-i merkūmu bi-safkatin vâhidetin mersûm Anaştaş zimmîye yetmiş bir bin dokuz yüz altmış üç guruşa bey‘ ü temlik ve teslîm ve mutasarrıf olduğum değirmen-i mezkûru dahi yine mesfûr Anaştaş zimmîye bâ-re’y-i mütevellî meccânen ferâğ ve tefvîz ve teslîm eylediğimden sonra ben târih-i merkūmda İstanbul kādısı bulunan sudûr-ı ı‘zâmdan Reşid Beyzâde sa‘âdetlü fazîletlü Mehmed Beyefendi hazretlerinin huzûrlarına varıp âlât-ı gedik-i merkūmu mersûm Anaştaş zimmîye bey‘-i bâtt-ı sahîh-i şer‘î ve safka-i vâhide ile bey‘ ve değirmen-i mezkûru dahi mesfûr Ohannes zimmîye re’y-i mütevellî ve ferâğ-ı kat‘î-i mu‘teber ile meccânen ferâğ eyledim deyü ikrâr ve cânib-i mîrîye yirmi sekiz bin dokuz yüz altmış üç guruş ve ma‘lûmü’l-esâmî tüccâra dahi kırk üç bin guruş ki cem‘an zimmetimde deynim olan yetmiş bir bin dokuz yüz altmış üç guruşu semen-i merkūmdan edâya mersûm Anaştaş zimmîye emr ve tarafımdan kabûlüne mukārin tevkîl edip ve ber-vech-i muharrer ikrâr ve tevkîlim hüccet-i şer‘iye olunup mersûm yedine i‘tâ olunmuş ise de lâkin ben nefsü’l-emrde gedik ve değirmen-i mezkûrları mersûm Anaştaş zimmî mâlından yüz bin guruş sermâye bana teslîm ve hâsıl olan ticâretden ben geçindikden sonra fazlasından semen-i merkūm yetmiş bir bin dokuz yüz altmış üç guruşu ahz birle yine gedik ve değirmen-i merkūmları geri bana reddetmek şartıyla mersûm Anaştaş zimmîye bey‘ ü ferâğ etmiş olup öyle olucak vech-i meşrûh üzere olan huzûr-ı hâkimde ikrârım mu‘teber olmamağla bey‘ ü ferâğ-ı merkūmlar ber-vech-i muharrer şart-ı müfsid ile olduğundan gedik ve değirmen-i mezkûrlardan keff-i yed edip bana teslîm etmek üzere mersûm Anaştaş zimmîye cebr olunmak murâdımdır deyü takrîr-i meşrûhu üzere inkâra dahi mukārin tasaddî eylediği da‘vâsı meşrû‘a ve iltifâta şâyân olmadığı müdde‘î-i mersûm Yanko zimmîye tefhîm ve mûcebince da‘vâ-yı mezkûresiyle mesfûr <> Anaştaş zimmîye bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî 26 M sene 1258