İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 284 Hüküm no: 237 Orijinal metin no: [90-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Andon’un Kasap Aleko’ya olan borcunu ödemesi 2500 [guru]ş hüküm [Ma‘rûz] Arzuhâl eden kasab Aleko v. Yani zimmî meclis-i şer‘-i hatîrde derûn-ı arzuhâlde ismi mastûr Kahveci Mihal v. Lamro nâm zimmînin sulbî kebîr oğlu Şerbethâneci Andon zimmî muvâcehesinde mersûm Andon zimmî zimmetinde cihet-i karzdan iki bin beş yüz guruş alacak hakkım olup hattâ meblağ-ı merkūm iki bin yüz yirmi guruş cihet-i mezkûreden zimmetinde bana deyni olduğunu milâd-ı hazret-i İsa’nın işbu bin <> sekiz yüz kırk iki senesi Şubatı’nın on altıncı günü ikrâr ve ber-vech-i muharrer ikrârını müştemil ve târih-i merkūm ile müverah Rumiyyü’l-imlâ yedime işbu bir kıt‘a deyn tahvîlini dahi vermekle meblağ-ı mezkûr iki bin beş yüz guruşu mersûm Andon zimmîden hâlâ taleb ederim deyü da‘vâ ettikde ol dahi cevâbında kaziyye minvâl-i meşrûh üzere olup ve meblağ-ı merkūm iki bin beş yüz guruş cihet-i mezkûreden müdde‘î-i mersûm Aleko zimmîye el-yevm zimmetinde sahîhan deyni olduğunu tâyi‘an ve kat‘iyyen ikrâr ü i‘tirâf etmeğin alâ-mûcibi i‘tirâfihi meblağ-ı mezkûr iki bin beş yüz guruşun müdde‘î-i mesfûr Aleko zimmîye edâsıyla mersûm Andon zimmî ilzâm olunduğu İstanbul Mahkemesi’nden huzûr-ı [âlîlerine i‘lâm olundu] Fî 19 S sene 1258