İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 284 Hüküm no: 238 Orijinal metin no: [90-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa ile Mehmed Efendi’nin aralarındaki alacak verecek davasında sulh oldukları 350 [guru]şa sulh ve ibrâ [Ma‘rûz] Sâhib-i arzuhâl Mehmed Ağa b. Mustafa meclis-i şer‘-i münîrde derûn-ı arzuhâlde mezkûrü’l-ism Değirmenci Mehmed Efendi b. Abdullah muvâcehesinde ben medîne-i Ebâ-Eyyûb-ı Ensârî’de kâin İmâret Değirmeni demekle arîf bir bâb değirmende müsteciren sâkin iken bin iki yüz elli altı senesi şehri Rebî‘ülevvel gāyetinde fesh-i icâre birle değirmen-i mezkûrdan hurûc edip mezbûr Mehmed Efendi mutasarrıflarından istîcâr ile duhûl ettikde bi-şarti’r-rücû‘ emriyle mâlımdan kendine iştirâ ve teslîm eylediğim iki yüz seksen kantar saman semeninden medfû‘um olan bin guruşu değirmen-i mezkûr derûnunda mevcûde ve mâlım olup bi-gayrı hakkın fuzûlî aldığı üç bin guruş kıymetli bir re’s kestane dorusu esb ve mecmû‘ı bin dokuz [yüz] altmış altı guruş kıymetli kırk sekiz hınta çuvalı ve yüz otuz sekiz dakīk çuvalı ve on dört hınta <<çuvalı>> eleği ve yirmi bir dakīk eleği ve iki sarı kalbur ve üç top köstek ve altı yedek ve on altı çarh yuları ve on bir çarh kolanı ve sekiz demir kandil ve yirmi altı bârgir çulu ve bir çarh direği ve dört kürek ve elli süpürge ve üç kaşağı ve altı yüz çarh dişi ve iki semerimi dahi mezbûr Mehmed Efendi’den hâlâ taleb ederim deyü tasaddî eylediğim da‘vâlarımdan bâ-tavassut-ı muslihîn mezbûr ile an-inkârin kat‘an-li’n-nizâ‘ ve üç yüz elli guruş bedel-i makbûza bi’t-terâzî ba‘de akdi’l-musâlaha ve’l-kabûl ziyâde müdde‘âlarıma ve bi’l-cümle husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden tarafeynden her birimiz âharın zimmetini kabûlümüzü hâvî ibrâ-i âmm-ı sahîh-i şer‘î ile ibrâ ve iskāt edip bu vechile külliyen kat‘-ı <> münâza‘a eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu] Fî 19 S sene 1258