İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 285 Hüküm no: 239 Orijinal metin no: [91-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yuvan v. Vasil’in Mehmed Âsaf Efendi’deki alacaklarından kalan kısmını tecil ettiği 11390 [guru]ş tecîl [Ma‘rûz] Arzuhâl sâhiblerinden olup İstanbul’da Ayasofya-i Kebîr Câmi‘-i şerîf’i civârında Dörtyolağzı nâm mahâlde bakkāl olan Yuvan v. Vasil zimmî Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i hatîrde Bâb-ı hazret-i Seraskerî’de vâki‘ yoklama odası ketebesinden derûn-ı arzuhâlde ismi mezkûr Mehmed Âsaf Efendi b. Ömer muvâcehesinde mezbûr Mehmed Âsaf Efendi zimmetinde mâlımdan ve yedimden iştirâ ve kabz eylediği bakkāl emti‘ası semenlerinden gayrı ez-teslîmât sahhe’l-bâkī on bir bin üç yüz doksan üç guruş alacak hakkım olup hattâ meblağ-ı bâkī-i merkūm on bir bin üç yüz doksan üç guruş cihet-i mezkûreden zimmetinde bana deyni olduğunu sene-i sâbıkā Zilhiccetü’ş-şerîfesinin yirmi yedinci günü ikrâr ve ber-vech-i muharrer ikrârını müştemil ve târih-i merkūm ile müverrah işbu bir kıt‘a deyn tahvîlini dahi yedime i‘tâ ettikden sonra üç yüz guruşunu bana edâ etmekle mâ‘adâsı olan on bir bin doksan üç guruşun iki bin beş yüz guruşunu hâlâ ve bâkīsi olan sekiz bin beş yüz doksan üç guruşun işbu târih-i i‘lâmdan beher şehr dörder yüz guruşdan yirmi bir ayda sekiz bin dört yüz guruş ve yüz doksan üç guruşunu dahi yirmi bir buçuk ay mürûrunda tamamen bana edâ ve teslîm etmek üzere mezbûr Mehmed Âsaf Efendi’yi rızâsıyla tecîl ve taksît eylediğimde ol dahi kabûl ve ber-vech-i muharrer edâ-i deyne ta‘ahhüd edip bu vechile kat‘-ı münâza‘a eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu] Fî 25 S sene 1258