İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 286 Hüküm no: 240 Orijinal metin no: [91-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safo bt. Mitro’nun Petra v. Yani’ye olan borcunu ödemeye söz verdiği 10682 [guru]ş edâya ta‘ahhüd [Ma‘rûz] Mu‘arrefetü’ş-şahs Safo bt. Mitro Nasrâniye meclis-i şer‘-i hatîrde yoğurtcu esnâfından bâ‘isü’l-i‘lâm Petr[o] v. Yano zimmî muvâcehesinde İstanbul’da Şeyh Ebulvefâ Câmi‘-i şerîfi civârında Voynuk Şücâeddin mahallesinde çeşme karşısında vâki‘ mersûm Petro zimmî ile mülkleri ale’l-iştirâki’s-seviyy taht-ı icâremizde derûnlarında mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmeleri bâ-temessük-i mütevellî bi’l-icâreteyn münâsafeten tasarrufumuzda olan bir bâb yoğurtcu kârhânesi ve bir bâb bostanı bin iki yüz kırk dokuz senesi şehri Rebî‘ülâhirinin on dördüncü günü vukū‘ bulan Tüfenkhâne-i âmire harîkinde muhterik olduklarında mersûm Petro zimmî bin iki yüz elli senesi hilâlinde kârhâne-i mezkûr ile ebniye-i bostan-ı merkūmu kendi mâlıyla binâ ve inşâ ve derûnlarından müstahlas âlât-ı gedik-i merkūmların ta‘mîre muhtâc olanlarını dahi kezâlik kendi mâlıyla ta‘mîr ve termîm ve kârhâne ve bostan-ı merkūmlara vaz‘ ettikden sonra yedimde olan işbu bir kıt‘a i‘lâm-ı şer‘î nâtık olduğu üzere sâlifü’l-beyân masrûfunun nısfını mersûm Petro zimmîye vermeye ta‘ahhüd etmiş idim el-hâletü hâzihî Ebniye-i hâssa müdîri Abdülhalim Efendi bendelerinin yedimizde olan işbu bir kıt‘a keşf defteri mantûkunca mesfûr Petro zimmînin minvâl-i muharrer üzere mâlından kadr-ı ma‘rûf masrûfu olan yirmi bir bin üç yüz altmış dört buçuk guruşun nısfı olup makbûlüm olan on bin altı yüz seksen iki guruş on parayı mersûm Petro zimmîye hâlâ edâ ve teslîme ta‘ahhüd edip bu vechile kat‘-ı münâza‘a eyledik dediğini mesfûr Petro zimmî tasdîk ve tahkīk eylediği tescîl ve İstanbul Mahkemesi’nden huzûr-ı [âlîlerine i‘lâm olundu] Fî 21 S sene 1258