İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 287 Hüküm no: 241 Orijinal metin no: [91-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Kahveci Bogos’un Oseb v. Avakim aleyhine açtığı alacak davasından vazgeçtiği
3000 [guru]ş rızâsıyla meccânen fâriğ
Ma‘rûz-ı dâ‘î-i Devlet-i aliyyeleridir ki
Arzuhâl eden Kahveci Bogos v. Agop zimmî meclis-i şer‘-i münîrde derûn-ı arzuhâlde ismi mastûr Çömlekçi Oseb v. Avakim zimmî muvâcehesinde mersûm Oseb zimmî sene-i sâbıkā şehri Ramazani’l-mübârekinin on beşinci günü İstanbul’da Ebu’l-feth Sultan Mehmed Han Câmi‘-i şerîf civârında Büyük Karaman nâm mahâlde vâki‘ Aci Agop nâm zimmînin berber dükkânında hâric-i hısn-ı İstanbul’da ba‘zı mahallerde kahvecilik etmek murâd ettikde ticâretinde beni kendine şerîk etmek üzere mersûm Oseb zimmîye târih-i merkūmda dükkân-ı mezkûrda mâlımdan üç bin guruş def‘ ü teslîm ol dahi ahz u kabz edip lâkin minvâl-i muharrer üzere kahvecilik etmiş ise de beni ticâret-i mezkûrede teşrîk etmediğinden mâ‘adâ meblağ-ı merkūm üç bin guruşu bana reddetmeyip bi-gayrı hakkın kendi umûruna sarfla istihlâk etmekle meblağ-ı mezkûr üç bin guruşu mesfûr Oseb zimmîden hâlâ tazmîn taleb ederim deyü inkârına mukārin tasaddî eylediğim da‘vâmdan rızâmla meccânen fâriğ olmamla bi’l-cümle husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden tarafeynden her birimiz âharın zimmetini kabûlümüzü hâvî ibrâ-i âmm-ı sahîh-i şer‘î ile ibrâ ve iskāt edip bu vechile külliyen kat‘-ı nizâ‘ eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu]
Fî 28 S sene 1258
|