İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 287 Hüküm no: 242 Orijinal metin no: [91-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Mehmed’in kiracısı olduğu turşucu dükkânının kirasına zam yapmayı kabul ettiği Turşucu dükkânı nizâ‘ına dâir [Ma‘rûz] Mahrûse-i Galata’da vâki‘ el-Hâc A‘mâ Câmi‘-i şerîfi’nin hâlâ imâmı ve bâ-irâde-i seniyye Hazîne-i Evkāf-ı Hümâyûn tarafından idâre olunan evkāfdan merhûm Mehmed Kemaleddin Vakfı’nın dahi bi’l-meşrûta mütevellîsi sâhib-i arzuhâl Mehmed Emin Keşşâf Efendi b. Osman bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi hâzır olduğu hâlde evvelen Çarşamba günü huzûr-ı hazret-i Fetvâ-penâhî’de ve ba‘dehû şifâhen sâdır olan fermân-ı âlîlerine imtisâlen müfettiş-i mûmâ-ileyh tarafından meb‘ûs Mehmed İzzet Efendi hâzır olduğu hâlde bâb-ı cenâb-ı müşârün-ileyhde İstanbul kādıları dâ‘îlerine tahsîs buyurulan dâirede ma‘kūd meclis-i şer‘-i münîrde zikri âtî vakıf turşucu dükkânına vaz‘-ı yedi mütehakkık ve gediğine mutasarrıf olan turşucu esnâfından derûn-ı arzuhâlde mezkûrü’l-ism Hasan b. el-Hâc Mehmed muvâcehesinde esnâf-ı mezkûre Kethudâsı Mehmed Ağa ve esnâf-ı merkūmeden Eğrikapılı Ahmed Ağa ve İbrahim Paşa ve Hamamlı Hasan Ağa ve Vefalı Ali Ağa ve Fenerli Ahmed Ağa ve Ayasofyalı el-Hâc Mehmed ve Alacahamamlı İsmail Ağa ve Kasımpaşalı el-Hâc Mehmed Ağa hâzır oldukları hâlde câmi‘-i şerîf-i mezkûr mahallesinde Çeşme Meydanı nâm mahâlde Yeşildirekli hamam karşısında kâin ma‘lûmü’l-hudûd fevkınde bir bâb odayı müştemil bir bâb turşucu dükkânı mütevellîsi olduğum vakf-ı mezkûr müsakkafâtından olup ve icâre-i vâhide ile îcârı meşrûta olmağla mezbûr Hasan beher şehr dörder guruş ücret ile müsteciri ve dükkân-ı mezkûr derûnunda mevcûde beyne’l-esnâf gedik ta‘bîr olunur Evkāf-ı Hümâyûn müstegallâtından âlât-ı lâzıme-i ma‘lûmenin dahi bâ-temessük-i mütevellî mutasarrıfı ise de lâkin ücret-i merkūme dükkân-ı mezkûrun ecr-i mislinden noksân-ı fâhişle noksân olduğundan ecr-i misli için beynimizde münâza‘ât-ı kesîre cereyân etmiş idi el-hâletü hâzihî dükkân-ı mezkûru işbu târih-i i‘lâmdan ecr-i misli idiği bî-garaz sikāt-ı Müslimîn ihbârlarıyla zâhir ve mezbûr Hasan’ın ikrârıyla mütehakkık olan beher şehr on beşer guruş icâre ile vakfa nâfi‘ olmağla mezbûr yedinde bi’t-tevliye ibkā eylediğimde ol dahi ber-vech-i muharrer kabûl ve ecr-i müsemmâ-yı mezkûru bilâ-ezâ bana mâh be-mâh edâya ta‘ahhüd edip bu vechile kat‘-ı münâza‘a eyledik dediğini mezbûr Hasan tasdîk ve tahkīk eylediği tescîl ve huzûr-ı âlîlerine i‘lâm olundu. Bâkī emr ü fermân hazret-i men-lehü’l-emr. Fî-gurreti şehri Rebî‘i’l-evvel li-sene semân ve hamsîn ve mi’eteyn ve elf.