İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 288 Hüküm no: 243 Orijinal metin no: [92-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dörtyolağzı’ndaki harap Yahudi ibadethanesinin tamiri için gerekli keşfin yapıldığı Sinâvî keşfi [Ma‘rûz] İşbu takrîr bâlâsına sâdır olan fermân-ı âlîlerine imtisâlen zikri âtî sinâvîyi mahâllinde bi’l-mu‘âyene keşf ü tahrîr ve misâha ve tahkīk için taraf-ı dâ‘îlerinden irsâl olunan Başkâtib es-Seyyid Hüseyin Rıza Efendi Ebniye-i Hâssa müdîri Hâcegân-ı Dîvân-ı hümâyûndan Abdülhalim Efendi bendeleri tarafından meb‘ûs hulefâdan Mehmed Said ve el-Hâc Ali halîfeler ile İstanbul hısnı ebvâbından Balatkapısı dâhilinde el-Hâc İsa mahallesinde Dörtyolağzı nâm mahâlde biri birine muttasıl simidci ve işkenbeci ve kasab dükkânları ve mağaza ve verâlarında vâki‘ Yahûd tâifesinin İfrikiye? Cemâ‘ati’ne mahsûs sinâvîlerine varıp cerîdede mazbûtü’l-esâmî kimesneler muvâcehelerinde akd-i meclis-i şer‘-i âlî ettikde Cemâ‘atbaşısı İlya v. Sabatay ve sinâvî-i mezkûr mütevellîsi İsak v. İsrail ve cemâ‘atinden İsrail v. İlya nâm Yahûdîler meclis-i ma‘kūd-ı mezkûrda her biri takrîr-i kelâm ve ifâde-i merâm edip işbu derûnunda akd-i meclis-i şer‘-i âlî olunan cemâ‘at-i mezkûreye mahsûs ve kadîm olan sinâvî-i mezkûr yüz dört seneden beri ta‘mîr ve termîm olunmadığından harâb ve inhidâma mâil olduğuna binâen ta‘mîr ve termîm etmedikçe âyînlerimizin icrâsı mümkün olmamağla ba‘de’l-keşf ve’l-misâha sinâvî-i mezkûr bilâ-tevsî‘ ve lâ-terfî‘ vaz‘-ı kadîmi ve hey’et-i asliyesi üzere ta‘mîr ve termîm olunmak bâbında izin ve ruhsatı hâvî bir kıt‘a fermân-ı âlî-şân sudûru murâdımızdır deyü istid‘â ve istirhâm ettiklerinde halîfetân-ı << mezbûrânın ma‘rifetleriyle keşf ve misâha>> mezbûrânın bir kıt‘a kâğıda ma‘rifet-i şer‘le ihrâc eyledikleri resm-i musattahları üzere sinâvî-i mezkûr mu‘âyene olunarak halîfetân-ı mezbûrân ma‘rifetleriyle keşf ve misâha olundukda tûlen otuz beş zirâ‘ ve arzen yirmi zirâ‘ terbî‘an yedi yüz zirâ‘ ve kadden sekiz buçuk zirâ‘ etrâf-ı erba‘ası bir zirâ‘ arzında kârgîr duvarlı ve cenûb ve şimâl cânibleri demir parmaklıklı onar aded dehliz pencere ve tepe camlı ve üzeri iki aded ahşâb kubbe ve kiremid pûşîdeli ve derûnunda perde pûşîdesiyle tarafeyni ikişer doğrama kanadlı iki dolablı Tevrât mevzi‘i ve biri cenûb tarafında ve biri şimâl tarafında avlusuna mekşûf ikişer doğrama kanadlı iki aded iç kapılı ve biri garb tarafında aralık mahâlline ve biri şimâl tarafında açıklık mahâlline mekşûf neccâr-kârî birer kanadlı iki aded iç kapılı fevkānî nisâ mahâlli kafes ile bölmeli ve derûnu ahşâb neşîmînli ve şeşhâne tuğla ferşli hora? ta‘bîr olunur mevzi‘li Yevm-i sebtde âyînleri icrâ olunan mahâl ve iç avlusu derûnunda tûlen on zirâ‘ sekiz parmak ve arzen beş zirâ‘ on beş parmak terbî‘an elli sekiz zirâ‘ ve kadden dört buçuk zirâ‘ garb ve şimâli tarafları sinâvî-i mezkûrun muhâfaza duvarı ve iki tarafı tahta kaplamalı ve üzeri kiremid pûşîdeli kara sakflı ma‘râz? ta‘bîr olunur yevm-i sebt’den mâ‘adâ âyînleri icrâ olunan ahşâb mahal ve garb cânibinde açıklık mahâlli derûnunda Berber Kasbar zimmî menzili ve bahçesine muttasıl yüz elli beş zirâ‘ altı parmak terbî‘inde ahşâb sundurma mahâlli ve altı zirâ‘ on dokuz parmak terbî‘inde etrâfı tahta kaplamalı ve üzeri kiremid pûşîdeli kara sakflı bir ferrâş odası ve pîşgâhında tahta perde ve neccâr-kârî taşra avluya hurûc eyleyecek bir kanadlı tahta kapı ve sinâvî-i mezkûr cenûbîsinde açıklık mahâllinde elli yedi zirâ‘ tûl ve bir zirâ‘ arz ve beş buçuk zirâ‘ kaddinde ve şark cânibinde elli buçuk zirâ‘ tûl ve kezâlik bir zirâ‘ arz ve altı zirâ‘ üç parmak kaddinde ve şimâli cânibinde zikr olunan dükkânlar ve mağaza verâlarında mârrü’z-zikr mağaza nihâyetine varınca yirmi dokuz zirâ‘ tûlünde ve bir zirâ‘ arzında ve kezâlik altı zirâ‘ üç parmak kaddinde ve tarîk-i âm cânibinde on altı zirâ‘ tûl ve kezâlik bir zirâ‘ arz ve beş buçuk zirâ‘ kaddinde ve zikr olunan ma‘râz mahâlli ile aralık mahâlli beynlerinde on buçuk zirâ‘ tûl ve yine bir zirâ‘ arz ve beş buçuk zirâ‘ kaddinde ve garb cânibinde zikri mürûr eden sundurmalı açıklık mahâllinin şimâl tarafında on altı buçuk zirâ‘ tûl ve kezâlik bir zirâ‘ arz ve beş zirâ‘ kaddinde ve garb cânibinde mersûm Berber Kasbar zimmînin menzil ve bahçe-i mezkûrelerine muttasıl yirmi dört zirâ‘ tûl ve yine bir zirâ‘ arz ve beş buçuk zirâ‘ kaddinde kârgîr muhâfaza duvarları sâlifü’l-beyân garb cânibinde açıklık mahâllinden aralık mahâlline ve şimâl tarafında açıklık mahâllinden zikr olunan aralık mahâlline ve ondan tarîk-i âmma mekşûf ve şimâl tarafında mârrü’l-beyân simidci dükkânı ittisâlinde olan iki zirâ‘ arzında diğer aralık mahâllinden ve cenûb tarafında açıklık mahâllinden yine tarîk-i âmma küşâde neccâr-kârî kezâlik iki kanadlı cem‘an beş aded kapı ve bir muhâfaza tahta perdesi ta‘mîr ve termîme muhtâc olup ve ber-minvâl-i muharrer cümlesi ta‘mîr ve termîm olunmadıkca sinâvî-i mezkûrda âyînlerinin icrâsı mümkün olmadığını halîfetân-ı mezbûrân ile sâir ebniye ve sukūf ahvâline vukūf-ı tamları olan bî-garaz sikāt-ı Müslimînden ve mahalle-i mezkûre ahâlisinden İmâm es-Seyyid Hafız Mehmed Efendi b. Ali ve muhtâr-ı sânî Taşçı Ahmed Ağa b. Mehmed ve Kenârcı Hüseyin Ağa b. Mehmed Ârif ve Mehmed Eşref Ağa b. Mehmed Emin ve sâir mazbûtü’l-esâmî kimesneler alâ-tarîki’ş-şehâde haber verdiklerini kâtib-i mûmâ-ileyh mahâllinde <> ketb ü tahrîr ve mâ‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği İstanbul Mahkemesi’nden huzûr-ı [âlîlerine i‘lâm olundu] Fî 5 S sene 1258