İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 290 Hüküm no: 244 Orijinal metin no: [92-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tanaş v. Nikola’nın borcunu ödemesi 8000 [guru]ş hüküm [Ma‘rûz] Acem tüccârından arzuhâl sâhibi Dimitri v. Aleksi zimmî meclis-i şer‘-i hatîrde tütüncü esnâfından derûn-ı arzuhâlde ismi mastûr Tanaş v. Nikola zimmî muvâcehesinde mersûm Tanaş zimmînin bir müddetden beri mâlımdan ve yedimden iştirâ ve kabz eylediği tönbeki semeni ile kezâlik mâlımdan ve yedimden iktirâz ve kabz ve umûruna sarfla istihlâk eylediği meblağın hesâbını milâd-ı hazret-i İsa’nın bin sekiz yüz kırk bir senesi Şubatı’nın sekizinci günü kendi ile yegân yegân sahîhan rü’yet eylediğimizde gayrı ez-teslîmât lede’l-muhâsebe sahhe’l-bâkī mersûm Tanaş zimmî zimmetinde semen-i mezkûr ve cihet-i karzdan sekiz bin guruş alacak hakkım zuhûr ettikde meblağ-ı merkūm bana zimmetinde sahîhan deyni olduğunu ikrâr-ı kat‘î ile ikrâr ve târih-i merkūm ile müverrah Rumiyyü’l-imlâ işbu bir kıt‘a deyn tahvîlini dahi yedime vermekle meblağ-ı mezkûr sekiz bin guruşu mesfûr Tanaş zimmîden hâlâ taleb ederim deyü da‘vâ ettikde ol dahi cevâbında kaziyye minvâl-i meşrûh üzere olduğunu bi-tamamihâ tâyi‘an ve kat‘iyyen ikrâr ü i‘tirâf etmeğin mûcebince meblağ-ı merkūm sekiz bin guruşun müdde‘î-i mesfûr Dimitri zimmîye edâsıyla mersûm Tanaş zimmî ilzâm olunduğu İstanbul Mahkemesi’nden huzûr-ı [âlîlerine i‘lâm olundu] Fî Selhi S sene 1258