İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 291 Hüküm no: 245 Orijinal metin no: [92-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Toma’nın Vasil v. Efrem’e olan borcunu ödediği Men‘ [Ma‘rûz] İstanbul’da Odunkapısı hâricinde bakkāl olan arzuhâl sâhibi Vasil v. Efrem zimmî meclis-i şer‘-i hatîrde derûn-ı arzuhâlde ismi mastûr İzmidli Attâr Toma v. Ohannes zimmî muvâcehesinde benim gāib ani’l-beled İzmidli Bakkāl Kadavcıoğlu Abraham v. Atam nâm zimmî zimmetinde cihet-i karzdan altı bin guruş alacak hakkım olup meblağ-ı mezkûra işbu sene-i mübâreke Muharremi’l-harâmının on altıncı günü işbu mesfûr Toma zimmî tarafeynden bi’l-emr ve’l-kabûl kefâlet-i mutlaka ile kefîl ve zâmin olmağla meblağ-ı merkūm altı bin guruş ve şehri mezkûrun yirmi beşinci günü dahi mersûm Toma zimmî mâlımdan ve yedimden iktirâz ve kabz ve umûruna sarfla istihlâk eylediği dört bin guruş ki cem‘an zimmetinde on bin guruş alacak hakkım olmağla meblağ-ı mecmû‘-ı merkūm on bin guruşu mersûm Toma zimmîden hâlâ taleb ederim deyü da‘vâ ettikde ol dahi cevâbında inkârından mâ‘adâ müdde‘î-i mersûm Vasil zimmî sâbıkā Saferi’l-hayr’ın yirmi dördüncü günü İstanbul’da Ahîçelebi Mahkemesi’nde nâibü’ş-şer‘ olan müderrisîn-i kirâmdan Kastamonulu Ömer Efendizâde Mehmed Sadık Efendi huzûrunda cemî‘ hukūk-ı şer‘iyeye müte‘allika âmme-i de‘âvîden benim zimmetimi kabûlümü hâvî ibrâ-i âmm-ı sahîh-i şer‘î ile ibrâ ve iskāt etmiş idi deyü mazmûnu takrîr-i meşrûhuna mutâbık ve târih-i merkūm ile müverrah ve nâib-i mûmâ-ileyhin hâtemiyle mahtûm bir kıt‘a i‘lâm-ı şer‘î ibrâzıyla eylediği def‘ini ve mazmûn-ı i‘lâm-ı mezkûru müdde‘î-i mersûm Vasil zimmî inkâr etmekle mersûm Toma zimmî eylediği def‘ini ve mazmûn-ı i‘lâm-ı mezkûru mahkeme-i mezbûre muhzırânından es-Seyyid İsmail Çelebi b. es-Seyyid Mahmud ve Hüseyin Çelebi b. Ali nâm kimesneler şehâdetleriyle bi’l-muvâcehe ber-nehc-i şer‘î isbât ettikde müdde‘î-i mersûm Vasil zimmî şâhidân-ı mezbûrânın âdiller ve eyledikleri şehâdetlerinde sâdıklar olduklarını ikrâr ve tasdîk etmeğin mûcebince müdde‘î-i mesfûr Vasil zimmî da‘vâ-yı mezkûresiyle mersûm Toma zimmîye bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî 3 Rebî‘ülevvel sene 1258