İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 291 Hüküm no: 246 Orijinal metin no: [93-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf kasap dükkânları ve gediklerine ait hisselerin satışı Kasab Tophâne’de [Ma‘rûz] Cennet-mekân firdevs-âşiyân Sultan Abdülhamid Han -aleyhi eltâfü Rabbihi’l-Mennân- hazretlerinin evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla ikinci selhhâneye merbût kasab dükkânlarından mahrûse-i Galata’ya muzâfe kasaba-i Tophâne’de atik sebîl ve çeşmeye muttasıl bir bâb ve çörekçi fırını karşısında kâin bir bâb ve Boğazkesen nâm mahâlde kâin bir bâb ki cem‘an üç bâb kasab dükkânları derûnlarında mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmelerin sümün hisselerine ve beşinci selhhâneye merbût yine kasaba-i mezkûrede Yağhâne önünde kâin bir bâb kasab dükkânı derûnunda mevcûde kezâlik beyne’l-esnâf gedik ta‘bîr olunur vakıf âlât-ı lâzıme-i ma‘lûmenin rub‘ hissesine ve yine kasaba-i merkūmede kâin Gürcüada demekle ma‘rûf bir bâb kasab dükkânı derûnunda mevcûde kezâlik beyne’l-esnâf gedik ta‘bîr olunur vakıf âlât-ı lâzıme-i ma‘lûmenin nısf ve rub‘ hisselerine bâ-temessük-i mütevellî bi’l-icâreteyn mutasarrıf olan Kosta v. Tanaş zimmî meclis-i şer‘-i hatîrde bâ‘isü’l-i‘lâm kasab Yani v. Nikola zimmî muvâcehesinde hâlâ Kassâbân müdîri es-Seyyid Mehmed Ali Bey ve sâir mazbûtü’l-esâmî kasab ustaları hâzır oldukları hâlde takrîr-i kelâm edip ber-vech-i muharrer mutasarrıf olduğum hısas-ı merkūmeyi hüsn-i rızâ ve tayyib-i hâtırım ve ferâğ-ı mu‘teber-i kat‘î ile mersûm Yani zimmîye bedel-i ma‘lûm ve makbûz ve müstehlek mukābelesinde bâ-re’y-i mütevellî ferâğ ve tefvîz eylediğimde ol dahi ber-vech-i muharrer tefevvüz ve kabûl ve hisse-i tevzî‘ini müdîr ve kasab ustaları ma‘rifetleriyle almağa ta‘ahhüd edip fî-mâ ba‘d gedik-i mezkûrların hisse-i merkūmeleri mersûm Yani zimmînin hakk-ı müfevvezi olup benim aslâ ve kat‘a alâka ve medhalim kalmamışdır deyü ba‘de’l-ikrâr ve’t-tasdîk hısas-ı merkūme fâriğ-i mesfûr Kosta zimmînin ferâğından defter-i vakf-ı şerîfde mersûm Yani zimmî uhdesine kayd ve der-dest olan temessük-i mezkûr hâmişine zabt ü tasarrufi’çün taraf-ı vakfdan tahrîr ve temhîr ve yedine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 5 Rebî‘ülevvel sene 1258