İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 292 Hüküm no: 247 Orijinal metin no: [93-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf kasap dükkânı gediğine ait hisselerin satışı Kasab Tophâne’de [Ma‘rûz] Cennet-mekân firdevs-âşiyân Sultan Abdülhamid Han -aleyhi eltâfü Rabbihi’l-Mennân- hazretlerinin evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla beşinci selhhâneye merbût kasab dükkânlarından mahrûse-i Galata’ya muzâfe kasaba-i Tophâne’de Çavuşbaşı nâm mahâlde kâin ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmenin nısf ve rub‘ hisselerine bâ-temessük-i mütevellî bi’l-icâreteyn mutasarrıfe ve hâlâ vilâyet-i Rumeli’de Ergirikasrı Kazâsı’na tâbi‘ Filiz karyesinde mütemekkine Vasilo bt. Vasil v. Kiga nâm Nasrâniyenin zevci ve tarafından husûs-ı âti’l-beyânda bâ-hüccet vekîl olduğu şahsını bilirler Kiryako v. Nikola ve Kanpo v. Petro nâm zimmîler şehâdetleriyle ber-nehc-i şer‘î sâbit olan Hıristo v. Vasil zimmî meclis-i şer‘-i hatîrde bâ‘isü’l-i‘lâm kasab Yani v. Nikola zimmî muvâcehesinde hâlâ Kassâbân müdîri es-Seyyid Mehmed Ali Bey ve sâir mazbûtü’l-esâmî kasab ustaları hâzır oldukları hâlde bi’l-vekâle takrîr-i kelâm edip zevcem müvekkilem gāibe-i mersûme Vasilo Nasrâniyenin ber-vech-i muharrer mutasarrıfe olduğu nısf ve rub‘ âlât-ı gedik-i merkūmu hüsn-i rızâ ve tayyib-i hâtırı ve ferâğ-ı mu‘teber-i kat‘î ile mersûm Yani zimmîye bi’l-vekâle bedel-i ma‘lûm ve makbûz ve müstehlek mukābelesinde bâ-re’y-i mütevellî ferâğ ve tefvîz ve teslîm ettiğimde ol dahi ber-vech-i muharrer tefevvüz ve tesellüm ve kabûl ve hisse-i tevzî‘ini müdîr ve kasab ustaları ma‘rifetleriyle almağa ta‘ahhüd edip fî-mâ ba‘d nısf ve rub‘ âlât-ı gedik-i merkūme mersûm Yani zimmînin hakk-ı müfevvezi olup müvekkilem mesfûre Vasilo Nasrâniyenin aslâ ve kat‘a alâkası kalmamışdır deyü ba‘de’l-ikrâr ve’t-tasdîk gedik-i mezkûrun nısf ve rub‘ hisseleri vekîl-i mersûm Hıristo zimmînin bi’l-vekâle ferâğından defter-i vakf-ı şerîfde mersûm Yani zimmî uhdesine kayd ve der-dest olan temessük-i mezkûr müvekkile-i mersûmenin mutasarrıfe olduğu mahâll-i sâire-i ma‘lûmede kâin kasab dükkânları gedikleri hisseleri’çün dahi verilmiş olmağla nısf ve rub‘ hisse-i merkūmeler temessük-i mezkûrdan ifrâz birle şerh verilip zabt ü tasarrufi’çün taraf-ı vakfdan müceddeden bir kıt‘a temessük tahrîr ve temhîr ve mersûm Yani zimmî yedine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 5 Rebî‘ülevvel sene 1258