İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 293 Hüküm no: 248 Orijinal metin no: [93-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf menzilin satışında meydana gelen ihtilafın giderildiği Menzil nizâ‘ını dâir [Ma‘rûz] Mübârek ve mes‘ûd rikâb-ı kamer-tâb-ı merâhim-nisâb-ı şâhâneye takdîm olunan arzuhâlde mezkûrü’l-ism olup medîne-i Üsküdar’da İhsâniye mahallesinde sâkin iken bin iki yüz elli üç senesi hilâlinde fevt olan sâbıkā harcî fırın Kâtibi Ömer Efendi b. Osman’ın zevcesi müteveffât Âişe Hatun’dan mütevellid sulbî kebîr oğlu olup kendinden sonra sene-i sâbıkā yani bin iki yüz elli yedi senesi şehri Rebî‘ülevvel hilâlinde fevt olan Ahmed Zemhi? Efendi’nin ashâb-ı arzuhâlden sulbiye sagīre kızı İsmet’in min-kıbeli’l-üm ceddesi ve tesviye-i umûruna kıbel-i şer‘den mansûbe vasîsi mu‘arrefetü’z-zât Zeyneb Hatun bt. Feyzullah müteveffâ-yı evvel-i mezbûrun zevce-i mezbûreden mütevellid diğer kebîr oğlu Mehmed Emin ve müteveffâ-yı evvel-i mezbûrun zevce-i menkûha-i metrûkesi Şerife Münire Hanım bt. İbrahim’den mütevellidler sagīr oğulları Osman Tevfik ve Süleyman Refik’in dahi vâlideleri ve tesviye-i emrlerine kezâlik vasîyy-i mansûbeleri zâtı mu‘arrefe mezbûre Şerife Münire Hanım hâzır oldukları hâlde bi’l-ma‘iyye rü’yete memûr Evkāf Müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi tarafından meb‘ûs Mehmed İzzet Efendi hâzır olduğu hâlde <> meclis-i şer‘-i münîrde derûn-ı arzuhâlde mezkûrü’l-ism eşrâf-ı kuzât-ı kirâm-ı fezâil-ittisâmdan hâlâ kethudâ-yı cânib-i mu‘allâ-elkāb-ı Fetvâ-penâhî Mehmed Emin Efendi b. Hüseyin tarafından husûs-ı âti’l-beyânda vekîl-i müsecceli Mehmed Emin Ağa b. Hasan muvâcehesinde müvekkil-i mûmâ-ileyh Mehmed Emin Efendi mukaddemâ bâ-temessük-i mütevellî bi’l-icâreteyn mutasarrıf olduğu İstanbul’da vâki‘ Osmaniye Câmi‘-i şerîfi Vakfı müsakkafâtından mahalle-i mezkûrede kâin ma‘lûmü’l-hudûd dâhilen ve hâricen fevkānî ve tahtânî dokuz bâb oda ve müştemilât-ı sâire-i ma‘lûmeyi muhtevî bir bâb vakıf menzil-i kebîri altmış beş bin guruş bedel mukābelesinde müteveffâ-yı evvel-i mezbûr Ömer Efendi’ye sıhhatinde bâ-re’y-i mütevellî ferâğ ve tefvîz ol dahi ber-vech-i muharrer tefevvüz ve kabûl ve bedel-i merkūm altmış beş bin guruşu mâlından teberru‘an müvekkil-i mûmâ-ileyhe def‘ ü teslîm ol dahi yedinden ahz u kabz ve emriyle kendi umûruna sarfla istihlâk ettikden sonra mezbûr Ömer Efendi ber-vech-i muharrer mutasarrıf olduğu menzil-i mezkûrun nısf hisse-i şâyi‘asını uhdesinde ibkā edip mâ‘adâ nısf hisse-i şâyi‘a-i âharını zevcesi hâzıra-i mezbûre Şerife Münire Hanım’a bâ-izn-i mütevellî ferâğ ve tefvîz etmekle ber-vech-i muharrer uhdesine ibkā eylediği nısf hisse-i şâyi‘a-i menzil-i mezkûr ile’l-vefât taht-ı tasarrufunda iken fevt oldukda nısf hisse-i şâyi‘a-i merkūme dört nefer evlâdı mezbûrûna âdiyen intikāl edip ba‘dehû içlerinden mezbûr Ahmed Zemhî? Efendi dahi vefât edip ve ber-vech-i muharrer menzil-i mezkûrdan mutasarrıf olduğu sümün hissesi kızı vasîsi olduğum sagīre-i mezbûreye intikāl etmiş idi lâkin ben hâzırân-ı asıl ve vasîyy-i mezbûrân Mehmed Emin ve Şerife Münire Hanım ile müteveffâ-yı sânî-i mezbûrun vefâtından beri mecmû‘-ı menzil-i mezkûru âhara ferâğ için yed-i münâdî ile mezâda verdiğimizde yirmi beş bin guruşdan ziyâdeye kimesne tâlib olmayıp bu sûretde müvekkil-i mûmâ-ileyhden müteveffâ-yı mezbûr Ömer Efendi mukaddemâ [94] menzil-i mezkûru bedel-i mislinden ziyâdeye tefevvüz etmiş ve ferâğ-ı mezkûrdan magbun olmuş olmağla öyle olucak müvekkil-i mûmâ-ileyh Mehmed Emin Efendi menzil-i mezkûru geri alıp ve kabz ve istihlâk eylediği meblağ-ı mezkûr altmış beş bin guruşu bize zâmin olsun deyü hâzırân-ı mezbûrân Mehmed Emin ve Şerife Münire Hanım ile mâ‘an bi’l-asâle ve bi’l-vesâye tasaddî eyledikleri da‘vâları takrîr-i meşrûhları üzere meşrû‘a ve iltifâta şâyân olmayıp li-ecli’l-ilzâm fetvâya havâle olunduklarında taraf-ı hazret-i Fetvâ-penâhî’den dahi adem-i meşrû‘iyyeti kendilere tefhîm olunduğu meclis-i şer‘a gelip takrîr etmeleriyle müdde‘iyûn-ı asıl ve vasîyy-i mezbûrûn Zeyneb Hatun ve Mehmed Emin ve Şerife Münire Hanım da‘vâ-yı mezkûreleriyle müvekkil-i mûmâ-ileyh Mehmed Emin Efendi’ye bî-vech-i şer‘î mu‘ârazadan men‘ olundukları İstanbul Mahkemesi’nden huzûr-ı [âlîlerine i‘lâm olundu] Fî 5 Rebî‘ülevvel sene 1258