İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 295 Hüküm no: 249 Orijinal metin no: [94-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koltukçu Mehmed’in kayınvalidesinin yanında büyüyen kızını almak talebiyle açtığı davanın kabul edilmediği Mu‘ârazadan men‘ [Ma‘rûz] Sâhib-i arzuhâl Koltukçu Mehmed b. Hasan şifâhen sâdır olan fermân-ı âlîlerine imtisâlen Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde İstanbul’da Davudpaşa İskelesi civârında kasab İlyas mahallesi imâmı derûn-ı arzuhâlde mezkûrü’l-ism es-Seyyid el-Hâc Mahmud Aziz Efendi b. el-Hâc Mehmed’in kayınvâlidesi ve mahalle-i mezkûrede sâkine ve nisâ-i sâlihâtdan idiği bî-garaz sikāt-ı Müslimînden ve mahalle-i mezkûre ahâlisinden ve zâtını ârifûn Muhtâr-ı sânî Abdullah Ağa b. Mehmed ve İmâm İbrahim Efendi b. Osman ve İsmail Ağa b. Abdullah ve Sîmkeş Mehmed Ağa b. Mehmed Emin ve İdris Efendi b. el-Hâc Kasım ve Kasablar Yazıcısı el-Hâc Mehmed Haşim Efendi b. el-Hâc Mehmed Emin ve Tesbîhî Salih Efendi b. Ahmed ve Helvacı Ömer Ağa b. Süleyman ve Tâhir b. Mustafa nâm kimesnelerin alâ-tarîki’ş-şehâde haberleriyle zâhir ve mütehakkık olan kezâlik derûn-ı arzuhâlde mezkûretü’l-ism Hatice Hatun bt. Ahmed ile dâmâdı mezbûr İmâm es-Seyyid el-Hâc Mahmud Aziz Efendi muvâcehelerinde mezbûr Koltukçu Mehmed’in on sekiz yaşında sulbiye-i kebîre ve bikr-i bâliğa kızı ve mezbûre Hatice Hatun’un mahalle-i mezkûrede vâki‘ menzilinde mezbûre Hatice Hatun ile mâ‘an hâlâ sâkine olup re’yi ve aklı müctemi‘ ve nefsine memûne idiği kezâlik zâtını ârifûn Müslimûn-ı merkūmûn haberleriyle mütehakkık olan Fâtımatü’z-zehra hâzıra olduğu hâlde bundan akdem kızım hâzıra-i mezbûre Fâtımatü’z-zehra beş yaşında ve ben dahi diyâr-ı âharda iken babam mezbûr Hasan kızım hâzıra-i mezbûreyi terbiye için mezbûr es-Seyyid el-Hâc Mahmud Aziz Efendi ma‘rifetiyle kayınvâlidesi mezbûre Hatice Hatun’a def‘ ü teslîm ol dahi ahz edip kızım hâzıra-i mezbûre on üç seneden berü mezbûre Hatice Hatun’un mahalle-i mezkûrede vâki‘ menzilinde mâ‘an sâkine ve re’yi ve aklı müctemi‘ olup ve nefsine memûne ve üzerine fesâd havfı dahi ma‘lûmum ve mezbûre Hatice Hatun dahi sâliha iseler de lâkin ben hâzıra-i mezbûrenin mücerred babası olup fî-mâ ba‘d mezbûre Hatice Hatun ile sâkine olduğuna râzı olmamamla öyle olucak kızım hâzıra-i mezbûreyi bana teslîm etmek üzere mezbûre Hatice Hatun ile dâmâd mezbûr es-Seyyid el-Hâc Mahmud Aziz Efendi’ye ve benim âhar mahâlde olan menzilimde benimle mâ‘an sâkine olmak üzere kızım hâzıra-i mezbûre Fâtımatü’z-zehra’ya cebr olunmak murâdımdır deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı müdde‘î-i mezbûr Koltukçu Mehmed’e tefhîm ve mûcebince da‘vâ-yı mezkûresiyle mezbûre Hatice Hatun ve dâmâd mezbûr es-Seyyid el-Hâc Mahmud Aziz Efendi ile kızı hâzıra-i mezbûre Fâtımatü’z-zehra’ya bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî 2 Rebî‘ülevvel sene 1258