İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 296 Hüküm no: 250 Orijinal metin no: [94-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap dükkânı gediğinin nakline izin verildiği Kasab [Ma‘rûz] Hudâvendigâr-ı esbak müstağrak-ı bihâr-ı rahmet-i Hak cedd-i emced-i hazret-i Hilâfet-penâhî mazhar-ı gufrân-ı ilâhî Sultan Abdülhamid Han -aleyhi eltâfü Rabbihi’l-Mennân- hazretlerinin evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla dördüncü selhhâneye merbût kasab dükkânlarından mahrûse-i Galata’da Karaki kapısı dâhilinde ekmekçi dükkânına muttasıl pesmânde ve mu‘attal olan bir bâb kasab dükkânını mülk sâhibi eşedd-i lüzûmuna binâen bundan akdem menziline ilâve etmekle derûnundan müstahlas beyne’l-esnâf gedik ta‘bîr olunur vakıf âlât-ı lâzıme-i ma‘lûmeye bâ-temessük-i mütevellî bi’l-icâreteyn mutasarrıf olup ve zikri âtî verilen nizâmdan mukaddem sene-i sâbıkā yani bin iki yüz elli yedi senesi Cumâdelâhiresinin on dokuzuncu günü dahi gedik-i mezkûru mahzûrdan sâlim mahâll-i âhara nakl birle icrâ etmek üzere bâ-i‘lâm cânib-i vakfdan temessük-i mezkûr hâmişine ol-vechile şerh verilerek kendine izin ve ruhsat verilen asâkir-i hâssa-i şâhânede Prusya Mütercimi arzuhâl eden Karabet v. Oseb zimmî bi’t-terâzî bâb-ı hazret-i Fetvâ-penâhî’de İstanbul kādıları dâ‘îlerine tahsîs buyurulan dâirede ma‘kūd meclis-i şer‘-i hatîrde hâlâ Yedikule ve Eğrikapı Kasablar müdîri es-Seyyid Mehmed Ali Bey ve ustalarından el-Hâc İbrahim Ağa ve el-Hâc Hasan Ağa ve es-Seyyid Mehmed Efendi ve el-Hâc Hüseyin Ağa ve Mehmed Necib Efendi ve el-Hâc Haşim Efendi ve Mehmed Ağa ve sâir mazbûtü’l-esâmî kimesneler hâzır oldukları hâlde takrîr-i kelâm edip ber-vech-i muharrer mutasarrıf olduğum gedik-i mezkûru mahzûrdan sâlim mahâll-i âhara nakle târih-i merkūmda taraf-ı vakfdan minvâl-i meşrûh üzere bana izin ve ruhsat verilmiş ise de lâkin târih-i merkūmdan berü bir münâsib mahâl tedârik edemediğimden nakl-i gedik edememişidim el-hâletü hâzihî anam gāibetü ani’l-meclis Biricik bt. Agop nâm Nasrâniye gedik-i merkūmu bâ-temessük-i mütevellî bi’l-icâreteyn mutasarrıfe olduğu bâ-irâde-i seniyye Hazîne-i Evkāf-ı Hümâyûn tarafından idâre olunan evkāfdan merhûm el-Hâc Ahmed Ağa Vakfı müsakkafâtından mahrûse-i Galata hâricinde Mekteb-i Tıbbiye-i Adliye kurbünde Tomtom mahallesinde Balıkpazarı’nda eczâcı ve yüncü? dükkânları karşısında tarîk-i hâs ve Balıkçı Gabril zimmî dükkânı beynlerinde kâin âhar gedikden ârî bir bâb vakıf dükkâna vaz‘ ve derûnunda Kasablık icrâ etmek üzere bana izin ve ruhsat verip ve el-yevm ol tarafda iki bâb kasab dükkânı mevcûd ise de kifâyet etmeyip ahâlisi muzâyakaya dûçâr olmalarıyla gedik-i merkūm dükkân-ı mezkûra nakl ve derûnuna vaz‘ olunması ve atik temessük-i mezkûr battalda hıfz birle mahâll-i evvelin kaydı ref‘ ü terkīn ve mahâll-i sânî-i mezkûrda mu‘teber ve müstakar olarak defter-i vakf-ı şerîfe kayd ve şurûtu derciyle taraf-ı vakfdan müceddeden yedime bir kıt‘a temessük i‘tâ buyurulmak murâdımdır deyü istid‘â ettikde fi’l-vâki‘ bu makūle kasab gediklerinin kasab dükkânı olup da kifâyet etmeyip ahâlisi muzâyakaya dûçâr olan mahallerde mutasarrıflarının rızâlarıyla âhar gedikden ârî dükkân-ı âharlara nakl ve bâ-i‘lâm minvâl-i muharrer üzere taraf-ı vakfdan temessük i‘tâsı sene-i sâbıkā-i merkūme Recebi’l-müreccebinin üçüncü günü târihiyle müverrah ve bâlâsı hatt-ı hümâyûn-ı adâlet-makrûn-ı pâdişâh-ı zaman ve tuğrâ-yı garrâ-yı hazret-i hâkān-ı devrân eyyedellâhu te‘âlâ ve ebkāhu mâ-te‘âkabel-cedîdân ile müzeyyen bir kıt‘a fermân-ı âlî-şân [95] mûcebince mu‘ahharan nizâm-yâfte olan şurût-ı mer‘iyelerinden idiğini müdîr ve esnâf-ı hâzırûn-ı mezbûrûn ve gāibe-i mersûme Biricik Nasrâniye râzıye olduğunu ve ahâli-i mahalle-i mezkûre diğer bir bâb kasab dükkânına dahi muhtâc olduklarını ahâli-i mahalle-i mezkûreden mazbûtü’l-esâmî Müslim ve re‘âyâ ihbâr etmeleriyle bu sûretde ber-vech-i istid‘â atik temessük-i mezkûr battalda hıfz birle gedik-i mezkûr mahâll-i evvelinin kaydı terkīn ve mahâll-i sânî-i mezkûrda mu‘teber ve müstekarr olarak defter-i vakf-ı şerîfe kayd ve şurûtu derciyle taraf-ı vakfdan müceddeden mersûm Karabet zimmî yedine bir kıt‘a temessük i‘tâsı re’y-i âlîlerine menût idiği huzûr-ı [âlîlerine i‘lâm olundu] Fî 9 Ra sene [12]58