İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 297 Hüküm no: 251 Orijinal metin no: [95-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İshak Efendi’nin borcunu ödemesi 1100 [guru]ş hüküm Ma‘rûz İstanbul’da Mahmudpaşa Câmi‘-i şerîfi civârında Kürkçüler Hanı’nda mütemekkin derûn-ı takrîrde mastûrü’l-ism Rusyalı Avakim v. Karabet nâm tâcir tercümânı Divirani? tarafından Yasakçı Süleyman ile yine hân-ı mezkûrda mütemekkin Kürkçü Manuk v. Abraham nâm zimmî hâzır oldukları hâlde meclis-i şer‘-i münîrde kezâlik derûn-ı takrîrde mezkûrü’l-ism İshak Efendi b. Erzurumî el-Hâc Mehmed muvâcehesinde mezbûr İshak Efendi’nin gāib ani’l-meclis İbrailli Hasan Ağa b. Abdulkadir nâm kimesneye cihet-i karzdan bâ-i‘lâm-ı şer‘î mahkûmün-bih deyni olup bi-şarti’r-rücû‘ emriyle mâlımdan hâzır-ı mesfûr Manuk zimmî ma‘rifetiyle gāib-i mezbûra edâ ve teslîm eylediğim dört yüz iki guruş ve mezbûr İshak Efendi yine hâzır-ı mersûm ma‘rifetiyle mâlımdan ve yedimden iktirâz ve kabz ve umûruna sarfla istihlâk eylediği altı yüz doksan sekiz guruş ki cem‘an bin yüz guruş mezbûr İshak Efendi zimmetinde alacak hakkım olup hattâ meblağ-ı mecmû‘-ı mezkûr bin yüz guruş ber-vech-i muharrer zimmetinde bana deyni olduğunu bin iki yüz elli altı senesi Muharremi’l-harâm’ı gurresinde ikrâr ve târih-i merkūm ile müverrah işbu bir kıt‘a deyn tahvîlini dahi yedime i‘tâ etmekle meblağ-ı mecmû‘-ı mezkûr bin yüz guruşu mezbûr İshak Efendi’den hâlâ taleb ederim deyü hâzır-ı mersûm Manuk zimmî tasdîkiyle da‘vâ ettikde mezbûr İshak Efendi dahi kaziyye minvâl-i meşrûh üzere olduğunu bi-tamamihâ tâyi‘an ve kat‘iyyen ikrâr ü i‘tirâf etmeğin alâ-mûcibi i‘tirâfihâ meblağ-ı mecmû‘-ı mezkûr bin yüz guruşun müdde‘î-i mersûm Avakim tâcire edâsıyla mezbûr İshak Efendi ilzâm olunduğu İstanbul Mahkemesi’nden huzûr-ı [âlîlerine i‘lâm olundu] Fî 8 Rebî‘ülevvel sene 1258