İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 298 Hüküm no: 252 Orijinal metin no: [95-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un kendisine ait enkaz ve bina taşlarının Abdülaziz Ağa tarafından zabtedildiği yolundaki iddiasını ispatlayamadığı Men‘ Ma‘rûz Vilâyet-i Anadolu’da Edincik kasabası ahâlisinden sâhibe-i arzuhâl mu‘arrefetü’z-zât Şerife Hatice Hatun bt. Ahmed meclis-i şer‘-i münîrde sâbıkā kasaba-i mezkûre voyvodası dergâh-ı mu‘allâ kapıcıbaşılarından derûn-ı arzuhâlde mezkûrü’l-ism Abdülaziz Ağa b. Osman muvâcehesinde mûmâ-ileyh Abdülaziz Ağa kasaba-i mezkûrede voyvoda iken işbu târih-i i‘lâmdan on iki sene mukaddem kasaba-i mezkûrede vâki‘ mâlik olduğum münhedim tüfenkçi dükkânının cem‘an beş yüz guruş kıymetli bâ-defter-i müfredât enkāz-ı ma‘lûmesini bi-gayrı hakkın fuzûlî ahz u kabz ve istihlâk ve kasaba-i mezbûre iskelesi civârında vâki‘ mülk bağımın dahi kârgîr duvarlarını kezâlik fuzûlî kal‘ ü hedm ve kezâlik cem‘an beş yüz guruş kıymetli iki yüz araba taşlarını ahz u kabz ve istihlâk etmekle cümlesinin kıymet-i mezkûrelerini mûmâ-ileyh Abdülaziz Ağa’dan hâlâ tazmîn taleb ederim deyü ba‘de’d-da‘vâ ve’l-inkâr müdde‘iye-i mezbûre ber-vech-i muharrer müdde‘âsını şâhidim yokdur deyü isbâtdan izhâr-ı acz ve istihlâf ettikde mûmâ-ileyh Abdülaziz Ağa bi’l-muvâcehe ber-nehc-i şer‘î tahlîf olunmağın mûcebince müdde‘iye-i mezbûre Şerife Hatice Hatun da‘vâ-yı mezkûresiyle mûmâ-ileyh Abdülaziz Ağa’ya bilâ-beyyine mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî 8 Rebî‘ülevvel sene 1258