İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 299 Hüküm no: 253 Orijinal metin no: [95-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Raşid Ağa ile eniştesi Mehmed Arif Ağa’nın menzil satışı davasında sulh oldukları 250 [guru]ş sulh Ma‘rûz Etbâ‘dan sâhib-i arzuhâl es-Seyyid Mehmed Râşid Ağa b. es-Seyyid Halil meclis-i şer‘-i münîrde hâlâ eniştesi Dîvân-ı de‘âvî çavuşlarından el-Hâc Mehmed Ârif Ağa b. Ahmed muvâcehesinde İstanbul’da Sultan Ahmed Han Câmi‘-i şerîfi civârında Nahılbend mahallesinde kâin ma‘lûmü’l-hudûd bir bâb vakıf menzilin bâ-temessük-i mütevellî bi’l-icâreteyn mutasarrıf olduğum sülüs hisse-i şâyi‘asını eniştem mezbûr el-Hâc Mehmed Ârif Ağa bundan mukaddem emir ve tevkîlimle âhara üç bin üç yüz otuz üç guruş bir akçe mukābelesinde fâriğ olmağla bedeli olup mefrûğun-leh-i merkūmun benim için teberru‘an verip eniştem mezbûr dahi bi’l-vekâle benim için makbûzu olan meblağ-ı merkūm üç bin üç yüz otuz üç guruş bir akçeyi bana vermeyip yedinde kalmağla hâlâ taleb ederim deyü tasaddî eylediğim da‘vâmdan bâ-tavassut-ı muslihîn mezbûr el-Hâc Mehmed Ârif Ağa ile an-inkârin kat‘an-li’n-nizâ‘ iki yüz elli guruş bedel-i makbûza bi’t-terâzî ba‘de-akdi’l-musâlaha ve’l-kabûl ziyâde müdde‘âma ve bi’l-cümle husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden ben eniştem mezbûr el-Hâc Mehmed Ârif Ağa ile zevcesi li-ebin kız karındaşım gāibetü ani’l-meclis Şerife Zeliha Hanım’ın zimmetlerini kabûle mukārin ibrâ-i âmm-ı sahîh-i şer‘î ile ibrâ ve iskāt edip bu vechile külliyen kat‘-ı nizâ‘ eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu] Fî 8 Ra sene 1258