İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 299 Hüküm no: 254 Orijinal metin no: [95-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf kasap dükkânı gedik hisselerinin satışı Kasab Kasımpaşa’da Ma‘rûz Cennet-mekân firdevs-âşiyân Sultan Abdülhamid Han -aleyhi eltâf-ı Rabbihi’l-Mennân- hazretlerinin evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla altıncı selhhâneye merbût kasab dükkânlarından mahrûse-i Galata’ya muzâfe kasaba-i Kasımpaşa’da Kulaksız Ahmed Kapudan mahallesinde kâin ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmeye bâ-temessük-i mütevellî bi’l-icâreteyn mutasarrıf olan es-Seyyid el-Hâc Osman Ağa b. es-Seyyid Hamdullah meclis-i şer‘-i münîrde kasab tâifesinden bâ‘isiyyü’l-i‘lâm İstati v. Petro ve Mitro v. Lazari ve Petro v. Dimitri zimmîler muvâcehelerinde hâlâ Kassâbân müdîri es-Seyyid Mehmed Ali Bey ve sâir mazbûtü’l-esâmî kasab ustaları hâzır oldukları hâlde takrîr-i kelâm edip ben ber-vech-i muharrer mutasarrıf olduğum âlât-ı gedik-i <> merkūmun sülüs hissesini mersûm İstati zimmîye ve südüs hissesini mersûm Mitro zimmîye ve nısf hissesini dahi mesfûr Petro zimmîye ferâğ-ı kat‘î ile bedel-i ma‘lûm ve makbûz ve müstehlek mukābelesinde bâ-re’y-i mütevellî ferâğ ve tefvîz ve teslîm eylediğimde onlar dahi ber-vech-i muharrer tefevvüz ve tesellüm ve hisse-i tevzî‘ini müdîr ve kasab ustaları ma‘rifetleriyle almağa ta‘ahhüd edip fî-mâ ba‘d gedik-i merkūm mesfûrûn İstati ve Mitro ve Petro zimmîlerin ber-vech-i muharrer hakk-ı müfevvezleri olup benim aslâ ve kat‘a alâka ve medhalim kalmamışdır deyü ba‘de’l-ikrâr ve’t-tesâdık gedik-i mezkûr fâriğ-i mezbûr es-Seyyid el-Hâc Osman Ağa’nın ferâğından defter-i vakf-ı şerîfde mersûmûn İstati ve Mitro ve Petro zimmîler uhdelerine kayd ve der-dest olan temessük-i mezkûr dahi battalda hıfz olunup taraf-ı vakfdan her birine birer kıt‘a temessük tahrîr ve temhîr ve zabt tasarrufları’çün yedlerine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 9 Ra sene [1]258