İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 300 Hüküm no: 255 Orijinal metin no: [95-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Satılan cariyenin ayıplı olduğunun anlaşılmasıyla iadesi 11000 [guru]ş hüküm [Ma‘rûz] Teba‘adan sâhib-i arzuhâl Ali Ağa b. Ahmed meclis-i şer‘-i münîrde derûn-ı arzuhâlde mezkûrü’l-ism Esirci Ahmed Ağa b. Abdulkadi[r] muvâcehesinde işbu târih-i i‘lâm şehrinin üçüncü günü cemî‘ uyûbdan sâlime olmak üzere on bir bin guruş semen-i medfû‘ ve makbûza mezbûr Ahmed Ağa’dan iştirâ ve kabz eylediğim işbu hâzıratü bi’l-meclis kara gözlü açık kaşlı tahmînen on bir yaşında bir re’s Çerkes câriye göçük ta‘bîr olunur yüzünün yemîninde firengi illetiyle mu‘ayyebe ve ayb-ı merkūm şirâ târihinden kadîm ve inde’t-tüccâr noksân-ı semen îcâb eder uyûbdan olup ve illet-i mezkûre elân câriye-i mezkûrede mevcûde olduğunu hâlâ Reisü’l-etibbâ-i hazret-i cihân-dârî ve Sadr-ı vâlâ-yı Rumeli devletlü atûfetlü Abdülhak Efendi hazretleri hâmiş-i arzuhâlde mastûr olduğu üzere i‘lâm dahi etmeleriyle redd-i mebî‘ ve istirdâd-ı semen murâdımdır deyü teveccüh-i husûmet bulundukdan sonra da‘vâ ettikde mezbûr Ahmed Ağa dahi cevâbında câriye-i mezbûreyi müdde‘î-i mezbûr Ali Ağa’ya ber-vech-i muharrer bey‘ini ve semen-i mezkûru kabzını ikrâr ve ayb-ı mezkûrun kıdemini inkâr etmekle müdde‘î-i mezbûr Ali Ağa illet-i mezkûre câriye-i mezbûrede şirâ târihinden kadîm olduğunu huzzâk-ı etibbâ ve cerrâhînden hâlâ İstanbul’da Sultan Bâyezid Han Câmi‘-i şerîfi civârında Kürkçüle[r] kapısı hâricinde sâkin Ahmed Efendi b. Hüseyin ve Aksaray civârında İpekciler Câmi‘i karşısında sâkin el-Hâc Ali Efendi b. Ahmed nâm şâhidîn-i mu‘addilîn şehâdetleriyle bi’l-muvâcehe ber-nehc-i şer‘î ba‘de’l-isbât ve’l-half mûcebiyle câriye-i mezbûreyi geriye ahz ve makbûzu olan semen-i merkūm on bir bin guruşu müdde‘î-i mezbûr Ali Ağa’ya redd ü teslîme mezbûr Ahmed Ağa’ya tenbîh olunduğu İstanbul [Mahkemesi’nden huzûr-ı âlîlerine i‘lâm olundu] Fî 20 Ra sene [12]58