İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 301 Hüküm no: 256 Orijinal metin no: [96-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar’daki İhsaniye mahallesinde denize akan sel sularının değiştirilen mecrasının eski haline döndürülmesi Üsküdar’da İhsâniye mahallesinden sel suyu mecrâsı küşâdına tenbîh Ma‘rûz Mübârek ve mes‘ûd rikâb-ı kamer-tâb-ı merâhim-nisâb-ı şâhâneye takdîm-i arzuhâl eden mu‘arrefetü’z-zât Şerife Hatice Hatun bt. es-Seyyid Hüseyin bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde derûn-ı arzuhâlde mezkûretü’l-ism Âişe Hatun bt. Salih b. Abdullah ve sadriye kebîre kızı Zeliha Hatun bt. el-Hâc İbrahim b. Abdülmennan’dan mezbûre Zeliha Hatun’un zevci ve taraflarından husûs-ı âti’l-beyânda vekîl-i sâbitü’l-vekâleleri Osman Ağa b. Süleyman muvâcehesinde cennet-mekân merhûm ve mağfiret-nişân Sultan Osman Han -aleyhi rahmeti’l-Mennân hazretlerinin vakf-ı şerîfleri müsakkafâtından medîne-i Üsküdar’da İhsâniye mahallesinde kâin bir bâb nâ-tamam vakıf menzil benim bâ-temessük-i mütevellî bi’l-icâreteyn müstakılleten taht-ı tasarrufumda ve ittisâlinde kâin ma‘lûmü’l-mikdâr bahçeyi müştemil bir bâb vakıf menzil dahi vekîl-i mezbûr Osman Ağa’nın müvekkileleri kayınvâlidesi ve zevcesi mezbûretân Âişe Hatun ve Zeliha Hatun’un kezâlik bi’l-icâreteyn münâsafeten taht-ı tasarruflarında olup lâkin bârân vukû‘ında mahalle-i mezkûre ve Selîmiye mahallesi ve Sıraservilik nâm mahâlden tecemmü‘ ve Harem İskelesi’ne mürûr eden tarîk ile müvekkiletân-ı mezbûrenin mutasarrıfe oldukları mârrü’l-beyân menzilin bahçesi duvarı ittisâlinde olan mahâll-i mu‘ayyenden deryâya cereyân eden sel suyunun mecrâsı olan mahâll-i mu‘ayyen-i mezkûru müvekkiletân-ı mezbûretân bi-gayrı hakkın tahvîl ile zikr olunan sel suyunu bahçe-i mezkûr duvarından beş zirâ‘ münfasıl mutasarrıfe olduğum menzil-i mezkûrun bahçesi olan mahâlden deryâya icrâ murâd etmeleriyle suâl olunup minvâl-i muharrer üzere icrâdan men‘ olunmak murâdımdır deyü vakf-ı şerîf-i mezkûrun kāimmakām-ı mütevellîsi ecille-i ricâl-i Devlet-i aliyyeden hâlâ Evkāf Nâzırı atûfetlü semâhatlü Numan Mahir Beyefendi tarafından mürsel vekîlleri hâzır olduğu hâlde da‘vâ ettikde vekîl-i mezbûr Osman Ağa dahi istintâk olundukda cevâbında mârrü’l-beyân tecemmü‘ eden sel suyu Harem İskelesi’ne mürûr eden tarîk ile mine’l-kadîm müvekkilelerim mezbûretânın mutasarrıfe oldukları menzil-i mezkûr bahçesi duvarından beş zirâ‘ münfasıl müdde‘iye-i mezbûrenin mutasarrıfe olduğu menzil-i mezkûr bahçesi olan mahâlden deryâya cereyân edegelir iken müdde‘iye-i mezbûre Şerife Hatice Hatun zikr olunan sel suyunun mecrâ-yı kadîmini bi-gayrı vechin sedd ü bend ve mârrü’z-zikr sel suyunu müvekkilelerim mezbûretânın mutasarrıfe oldukları menzil-i mezkûr bahçesi duvarı ittisâlinde olan mahâll-i mezkûrdan deryâya icrâ edip bundan mukaddem vukū‘ bulan kesret-i bârânda mahâll-i mezkûreden tecemmü‘ edip gelen sel duvar-ı mezkûr esâsını naks ve duvar-ı mezkûrun on üç zirâ‘ mahâllini külliyen hedm ve ol-vechile zarar-bîni olduğundan yedimde olup sene-i sâbıkā Şa‘bâni’l-mu‘azzamının yirmi yedinci günü târihiyle müverrah ve müfettiş-i mûmâ-ileyhin hâtemini hâvî bir kıt‘a i‘lâm-ı şer‘î nâtık olduğu üzere müfettiş-i mûmâ-ileyh tarafından mezûnen bi’l-hükm irsâl olunan Kâtib es-Seyyid Mehmed Şakir Efendi Ebniye-i Hâssa müdîri Efendi hulefâsından el-Hâc Ali ve Ahmed Şevki halîfeler ile bahçe-i mezkûra varıp kāimmakām-ı mütevellî vekîli câbî-i vakf el-Hâc Osman Efendi b. Hüseyin hâzır olduğu hâlde huzûr-ı Müslimînde akd eylediği meclis-i şer‘-i âlîde ben kayınvâlidem ve zevcem mezbûretân Âişe ve Zeliha hatunlar taraflarından ba‘de-isbâti’l-vekâle müdde‘iye-i mezbûre [Şerife Hatice] hatun ile lede’t-terâfu‘ inkârına mukārin bi’l-vekâle da‘vâ-yı mezkûremi udûl-i Müslimînden mahalle İmâmı Hüseyin Efendi b. Ali ve muhtârları Ali Efendi b. el-Hâc İbrahim ve Mehmed Şakir Efendi b. Ali ve ahâlisinden dergâh-ı âlî kapıcıbaşılarından Abdullah Ağa b. Abdurrahman ve hâcegân-ı Dîvân-ı hümâyûndan el-Hâc Mehmed Efendi b. Ahmed ve Mehmed Beyefendi b. Abdullah ve Lütfullah Efendi b. Abdullah ve Mehmed Râşid Ağa b. el-Hâc Hasan ve Ahmed Ağa b. Mustafa ve İsmail Ağa b. Hasan ve el-Hâc Mehmed Said Efendi b. Abdullah ve Şalcı Mehmed Ağa b. Abdurrahman nâm kimesnelerin ta‘yîn ve işâret ederek bi’l-muvâcehe vech-i şer‘î üzere eyledikleri şehâdetleriyle isbât edip mûcebince mezbûre Hatice Hatun ber-vech-i muharrer sedd ü bend eylediği mahâll-i mezkûru küşâd ve zarar-bînini def‘ etmek üzere mezbûre Şerife Hatice Hatun’a tenbîh ve kıbel-i şer‘den yedime i‘lâm-ı mezkûr i‘tâ olunmuş iken mahâll-i mezkûru küşâd ve zarar-bînliği def‘ etmemekle ber-mûceb-i i‘lâm-ı mezkûr mahâll-i mezkûru küşâd ve zarar-bînini def‘ etmek üzere mezbûre şerîfe Hatice Hatun’a tenbîh olunmak bi’l-vekâle matlûbumdur deyü mazmûnu takrîr-i meşrûhuna mutâbık bir kıt‘a i‘lâm-ı şer‘î ibrâzıyla eylediği da‘vâsını ve mazmûn-ı i‘lâm-ı mezkûru müdde‘iye-i mezbûre Şerife Hatice Hatun inkâr etmekle müdde‘î-i vekîl-i mezbûr Osman Ağa mazmûn-ı i‘lâm-ı mezkûru mahalle-i mezkûre ahâlisinden el-Hâc Mehmed Ağa b. Abdullah ve Mehmed Ağa b. Ömer nâm şâhideyn-i mu‘addileyn şehâdetleriyle huzûr-ı cenâb-ı Fetvâ-penâhî’de müdde‘iye-i mezbûre Şerife Hatice Hatun muvâcehesinde vech-i vecîh-i şer‘î üzere isbât ettikde müdde‘iye-i mezbûre mazmûn-ı i‘lâm-ı mezkûru ikrâr ü i‘tirâf dahi etmeğin mûcebiyle mezbûre Şerife Hatice Hatun minvâl-i muharrer üzere sedd ü bend eylediği mecrâ-yı kadîm-i mezkûru küşâd ve zarar-ı mezkûru ref‘ etmek üzere mezbûre Şerife Hatice Hatun’a kemâ-fi’s-sâbık tenbîh olunduğu İstanbul Mahkemesi’nden huzûr-ı [âlîlerine i‘lâm olundu] Fî 2 Ra sene 1258