İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 303 Hüküm no: 257 Orijinal metin no: [96-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf berber dükkânından ihrac talebinin geçersiz olduğu Kasaba-i Tophâne’de berber dükkânı gediğine dâir Ma‘rûz Derûn-ı arzuhâlde mezkûrü’l-ism olup mahrûse-i Galata’ya muzâfe kasaba-i Tophâne’de Süheylbey mahallesi ahâlisinden iken bundan akdem hacc-ı şerîf avdetinde esnâ-i tarîkde fevt olan Berber es-Seyyid el-Hâc Hüseyin Ağa b. İsmail’in verâseti zevce-i menkûha-i metrûkeleri Cemile Hatun bt. Ali ve Hacce Âişe Hatun bt. el-Hâc İsmail ile li-ebeveyn kız karındaşı Şerife Ümmühani Hatun ve li-ebeveyn ammioğlu Mustafa Efendi b. Mustafa’ya ba‘de’l-inhisâr sâhibe-i arzuhâl mu‘arrefetü’z-zât mezbûre Cemile Hatun bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde zikri âtî gedik âlâtına vaz‘-ı yedi mütehakkık olan derûn-ı arzuhâlde mezkûretü’l-ism kezâlik mu‘arrefetü’z-zât mezbûre Şerife Ümmühani Hatun muvâcehesinde hâmiş-i arzuhâlde mastûr derkenâr nâtık olduğu üzere bâ-irâde-i seniyye Hazîne-i Evkāf-ı Hümâyûn tarafından idâre olunan evkāfdan merhûm el-Hâc Hüseyin Efendi Vakfı müsakkafâtından bâ-temessük-i mütevellî bi’l-icâreteyn mutasarrıfe olduğum mahalle-i mezkûrede menzilim tahtında kâin ma‘lûmü’l-hudûd bir bâb vakıf berber dükkânında kirâ-yı kadîmesi olan beher şehr onar guruş kirâ ile mezbûre Şerife Ümmühani Hatun müşâhereten müstecirem olup işbu târih-i i‘lâm-ı şehr gāyetine izâfetle fesh-i akd-i icâre etmemle dükkân-ı mezkûru gāyet-i şehr-i merkūmda tahliye ve bana teslîme mezbûre Şerife Ümmühani Hatun’a tenbîh olunmak matlûbumdur deyü da‘vâ ettikde ol dahi cevâbında dükkân-ı mezkûr müdde‘iye-i mezbûrenin ber-vech-i muharrer taht-ı tasarrufunda olup ve kendisi beher şehr ol-mikdâr guruş kirâ ile müsteciresi olduğunu ikrâr lâkin dükkân-ı mezkûr derûnunda mevcûde beyne’l-esnâf mu‘teber gedik âlâtı olup ve gedik âlât-ı merkūm mûrisimiz müteveffâ-yı mezbûr es-Seyyid el-Hâc Hüseyin Ağa’nın hayatında ile’l-vefât bâ-hüccet müstakil yedinde mülkü ve ba‘de vefâtihi âlât-ı merkūme benimle zevce-i müdde‘iye-i mezbûre Cemile Hatun ve diğer zevcesi mezbûre Hacce Âişe Hatun’a ve li-ebeveyn ammioğlu mezbûr Mustafa Efendi’ye mevrûs olup ol-vechile yedimizde mülk ve hakkımız iken bin iki yüz elli üç senesi Cumâdelûlâsı’nın on dokuzuncu günü târihiyle müverrah ve ol târihde mahrûse-i İstanbul? kādısı bulunan Boluvîzâde fazîletlü es-Seyyid Mehmed Esad Efendi’nin hâtemiyle mahtûm bir kıt‘a i‘lâm-ı şer‘î nâtık olduğu üzere ben bi’l-asâle ve ol târihde mezbûr Mustafa Efendi diyâr-ı âharda bulunmağla hisse-i irsiyesini ahz u kabz ve kendine irsâl [97] ve îsâle kıbel-i şer‘den vasî ve kayyım nasb olunmamla bi’l-vesâye ve müdde‘iye-i mezbûre Cemile Hatun ile diğer zevce-i mezbûre Hacce Âişe hatunlardan her biri dahi bi’l-asâle âlât-ı gedik-i merkūmu tarafeynden bi’l-îcâb ve’l-kabûl bey‘-i bâtt-ı sahîh-i şer‘î ve safka-i vâhide ile semen-i misli olan yedi bin guruşa köşe ustası gāib ani’l-meclis İbrahim Ağa b. Mehmed’e bey‘ u temlik ve teslîm eylediğimizde ol dahi ber-minvâl-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezkûr yedi bin guruşu dahi yedinden tamamen bi’l-asâle ve bi’l-vesâye ahz u kabz ve müteveffâ-yı mezbûrun defter-i kassâmına idhâl eylediğimizden sonra gāib-i mezbûr İbrahim Ağa dahi ber-minvâl-i muharrer şirâen mâlik olduğu âlât-ı gedik-i merkūmu kezâlik tarafeynden bi’l-îcâb ve’l-kabûl bey‘-i kat‘î ve safka-i vâhide ile yedi bin guruş semen-i medfû‘ ve makbûza bana bey‘ ü temlik ve teslîm ben dahi iştirâ ve temellük ve tesellüm ve kabz ü kabûl edip ol-vechile âlât-ı mezkûre müstakılleten yedimde mülküm iken arzuhâl-i mezkûr hâmişinde mastûr diğer derkenâr nâtık olduğu üzere âlât-ı merkūmeyi sene-i mezkûre Cumâdelâhiresinin dördüncü günü Hudâvendigâr-ı sâbık müstağrak-ı bihâr-ı rahmet-i Hâlık vâlid-i kesîrü’l-mehâmid-i hazret-i Hilâfet-penâhî mazhar-ı gufrân-ı İlâhî Sultan Mahmud Han -aleyhi eltâfü Rabbihi’l-Mennân- hazretlerinin evkāf-ı celîlelerine teberru‘ ve tashîh eyleyerek yevmî bir akçe icâre-i müeccele ile taraf-ı evkāf-ı celîleden istîcâr ve usûlü üzere bir kıt‘a mütevellî temessüğü ahz etmemle binâen-aleyh kirâ-yı kadîme-i mezkûresini edâ ile dükkân-ı mezkûru zabt u tasarruf ederim deyü mazmûnu takrîrine mutâbık bir kıt‘a i‘lâm-ı şer‘î ve bir kıt‘a temessük-i mütevellî ibrâz ettikde müdde‘iye-i mezbûre Cemile Hatun dahi mazmûn-ı i‘lâm ve temessük-i mezkûrları ikrâr ve tasdîk eylediğinden mâ‘adâ bu makūle evkāf-ı celîleye teberru‘ olunan gediklerin mutasarrıfları mâh be-mâh kirâ-yı kadîmelerini bilâ-cefâ edâ eyledikleri sûretde ihrâc olunmamak evkāf-ı mezkûrenin bâ-hatt-ı hümâyûn-ı şevket-makrûn mer‘î ve mu‘teber nizâmından olmağla mezbûre Şerife Ümmühani Hatun’dan dükkân-ı mezkûrun kirâ-yı kadîmesini alıp ihrâcıyla rencîde olunmamak muktezâ-yı nizâm idiği müdde‘iye-i mezbûre Cemile Hatun’a tefhîm olunduğu İstanbul Mahkemesi’nden huzûr-ı [âlîlerine i‘lâm olundu] Fî 9 Ra sene [1]258