Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 460 Hüküm no: 547 Orijinal metin no: [90a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hanîfe bt. Ahmed’in icâreteynli vakıf menzilini Hacı Mustafa b. Ahmed ve eşine satması Mahmiye-i İstanbul’da Ferhad Ağa mahallesinde sâkine olup zâtı ma‘rifet-i şer‘iyye ile ârifân olan el-Hâc Ahmed b. Ali ve el-Hâc Mehmed b. Mehmed nâm kimesneler ta‘rîfleriyle mu‘arrefe olan Hanîfe bt. Ahmed nâm hâtun meclis-i şer‘-i şerîf-i enverde bâ‘isü’l-kitâb el-Hâc Mustafa b. Ahmed ile zevcesi Ümmühâni bt. Abdullah nâm hâtun mahzarlarında bi tav‘ihâ ikrâr-ı tâm ve takrîr-i kelâm edip merhûm Sunullah Efendi vakfından olup icâreteyn-i ma‘lûmeteyn ile taht-ı tasarrufumda olup mahalle-i mezbûrede vâki‘ iki tarafı vakf-ı mezbûrdan olup berber Mehmed ve Yusuf tasarruflarında olan menzil ve bir tarafdan Hüsameddin vakfından olup Fâtıma Hâtun tasarrufunda olan menzil ve bir tarafdan tarîk-i âm ile mahdûd bir bâb fevkānî oda ve bir köşk ve bir bâb tahtânî oda ve bir su kuyusu ve havlu ve kenîf ve bir mikdâr arsa-i hâliyeyi müştemil menzili, cümle tevâbi‘ ve levâhıkı ve kâffe-i menâfi‘ ve merâfıkı ile beş yüz elli beş guruş bedel mukābelesinde izn-i mütevellî ile mezbûrân el-Hâc Mustafa ve Ümmühâni’ye ferâğ ve tefvîz ve mezbûrân dahi ale’l-iştirâk tefevvüz ve kabûl ve kabz eylediklerinden sonra bedel-i mezbûru yedlerinden tamâmen ahz u kabz eyledim ba‘de’l-yevm menzil-i mahdûd-ı mezkûr mezbûrânın hakk-ı müfevvezleri olmuşdur keyfe mâ yeşâ ve yahtâr mutasarrıf olsunlar dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: El-Hâc Ahmed b. Ali, el-Hâc Mehmed b. Mehmed, es-Seyyid Abdullah Çelebi b. es-Seyyid İslâm, es-Seyyid İslâm b. es-Seyyid Mustafa, el-Hâc İbrahim b. İbrahim, Abdurrahman? [b.] el-Hâc Osman, el-Hâc Süleyman b. Mustafa, Ahmed Beşe b. Abdullah.