İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 305 Hüküm no: 258 Orijinal metin no: [97-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden berber esnafının duacısı Mustafa b. Halil’in yerine duacı atanması Berberân esnâfının du‘âcı nasbı Der-i devlet-mekîne arz-ı dâ‘î-i kemîneleridir ki İstanbul’da vâki‘ berberân esnâfının bilâ-ta‘yîn du‘âcılığına mutasarrıf olan Mustafa b. Halil fevt olup yeri hâli ve hizmet-i lâzımesi mu‘attal kalmağla du‘âcılık-ı mezkûr mahlûlünden şurûtu üzere esnâf-ı mezkûrenin bilâ-ta‘yîn yiğitbaşısı olan erbâb-ı istihkākdan es-Seyyid Mehmed Tâhir b. es-Seyyid Mehmed Nuri’ye müstakıllen ve yiğitbaşılık-ı mezkûr esnâf-ı merkūmenin bilâ-ta‘yîn rub‘ hisse çavuşluğuna mutasarrıf olan es-Seyyid Hasan b. es-Seyyid Ali ve selâse-i erbâ‘ hisse çavuşluğuna mutasarrıflar olan İbrahim Halil ve Ömer Tâhir ve Ebûbekir ibnâ-i el-Hâc Ömer’e hisse-i merkūmelerine göre çavuşluk-ı mezkûr müteveffâ-yı mezbûrun sulbî sahîh oğulları olduğu bi’l-ihbâr zâhir olan es-Seyyid Halil ve es-Seyyid Mehmed Şakir ve es-Seyyid el-Hâc Mustafa Râşid’den mezbûr es-Seyyid Halil rızâsıyla keff-i yed edip karındaşları erbâb-ı isti‘dâddan merkūmân es-Seyyid Mehmed Şakir ve es-Seyyid el-Hâc Mustafa Râşid’e nısfiyet üzere tevcîh ve yedlerine başka başka berât-ı âlî-şân verilmek ricâsına bi’l-iltimâs pâye-i serîr-i a‘lâya arz ve i‘lâm olundu. Bâkī emr ü fermân hazret-i men-lehü’l-ihsân[ındır] Fi’l-yevmi’s-sâlis aşer min-şehri Rebî‘i’l-evvel li-sene semân ve hamsîn ve mi’eteyn ve elf.