İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 305 Hüküm no: 259 Orijinal metin no: [97-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın borcunu ödemesi 8500 [guru]ş hüküm [Ma‘rûz] Arzuhâl sâhibleri Keresteci Yordam v. Abram ve şerîki Mihal v. Kostandi zimmîler Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde derûn-ı arzuhâlde mezkûrü’l-ism etbâ‘dan el-Hâc Ali Ağa b. Ali muvâcehesinde hâlâ kayınvâlidesi olup İstanbul’da Langa Yenikapısı dâhilinde Baklalı Kemaleddin mahallesinde sâkine mu‘arrefetü’z-zât Ümmügülsüm Hatun bt. el-Hâc Mehmed ve li-ebeveyn er karındaşı Attâr Mahmud Ağa b. el-mezbûr el-Hâc Mehmed ve mezbûre Ümmügülsüm Hatun’un diğer hâlâ dâmâd Attâr el-Hâc Ahmed Ağa b. Mustafa hâzır olduğu hâlde mezbûr el-Hâc Ali Ağa zimmetinde sene-i sâbıkā hilâlinde kayınvâlidesi hâzıra-i mezbûre Ümmügülsüm Hatun’un mutasarrıfe olduğu mahalle-i mezkûrede kâin bir bâb menzilin müceddeden binâ ve inşâsı’çün akdi nefsine izâfetle hâzırân-ı mezbûrân Mahmud Ağa ve el-Hâc Ahmed Ağa ma‘rifetleriyle müşterek mâlımızdan iştirâ ve kabz eylediği ecnâs ve aded ve fiyâtı beynimizde ma‘lûm kereste semenlerinden on dokuz bin guruşdan bâkī sekiz bin beş yüz guruş alacak hakkımız olmağla meblağ-ı bâkī-i merkūm sekiz bin beş yüz guruşu mezbûr el-Hâc Ali Ağa’dan hâlâ taleb ederim deyü da‘vâ ettiklerinde ol dahi cevâbında kaziyye minvâl-i meşrûh üzere olduğunu bi-tamamihâ tâyi‘an ve kat‘iyyen ikrâr ü i‘tirâf etmeğin alâ-mûcibi i‘tirâfihâ meblağ-ı bâkī-i mezkûr sekiz bin beş yüz guruşun müdde‘iyân-ı şerîkân-ı mesfûrân Yordam ve Mihal zimmîlere edâsıyla mezbûr el-Hâc Ali Ağa ilzâm olunduğu İstanbul Mahkemesi’nden huzûr-ı [âlîlerine i‘lâm olundu] Fî 16 Ra sene [1]258