İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 306 Hüküm no: 260 Orijinal metin no: [97-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf kasap gediği hissesinin satışı Kasab [Ma‘rûz] Cennet-mekân adn-âşiyân Sultan Abdülhamid Han -sabbet aleyhi sicâlü’l-gufrân- hazretlerinin evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla beşinci selhhâneye merbût kasab dükkânlarından İstanbul’da Sultan Bâyezid-i Velî Han Câmi‘-i şerîfi civârında Vezneciler içinde vâki‘ ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmeye bâ-temessük-i mütevellî bi’l-icâreteyn müstakıllen mutasarrıf olan es-Seyyid Ahmed Ağa b. es-Seyyid Ömer meclis-i şer‘-i münîrde li-ebeveyn er karındaşı bâ‘isü’l-i‘lâm kasab es-Seyyid Mehmed Ağa muvâcehesinde hâlâ Kassâbân müdîri es-Seyyid Mehmed Ali Bey ve sâir mazbûtü’l-esâmî kasab ustaları hâzır oldukları hâlde takrîr-i kelâm edip ben ber-vech-i muharrer mutasarrıf olduğum gedik-i mezkûrun nısf hissesini uhdemde ibkā edip mâ‘adâ nısf hissesini hüsn-i rızâ ve tayyib-i hâtırım ve ferâğ-ı mu‘teber-i kat‘î ile karındaşım mezbûr es-Seyyid Mehmed Ağa’ya bedel-i ma‘lûm ve makbûz ve müstehlek mukābelesinde bâ-re’y-i mütevellî ferâğ ve tefvîz ve teslîm eylediğimde ol dahi ber-vech-i muharrer tefevvüz ve tesellüm ve kabûl ve hisse-i tevzî‘ini müdîr ve kasab ustaları ma‘rifetleriyle almağa ta‘ahhüd edip fî-mâ ba‘d gedik-i mezkûrun nısf hissesi karındaşım mezbûrun hakk-ı müfevvezi olup benim aslâ ve kat‘a alâka ve medhalim kalmamışdır deyü ba‘de’l-ikrâr ve’t-tasdîk gedik-i mezkûrun nısf hissesi fâriğ-i mezbûr es-Seyyid Ahmed Ağa’nın ferâğından defter-i vakf-ı şerîfde karındaşı mezbûr es-Seyyid Mehmed Ağa uhdesine kayd ve der-dest olan temessük-i mezkûrdan ifrâz birle şerh verilip zabt ü tasarrufi’çün taraf-ı vakfdan müceddeden bir kıt‘a temessük tahrîr ve temhîr ve mezbûr es-Seyyid Mehmed Ağa yedine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 19 Ra sene 1258