İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 307 Hüküm no: 261 Orijinal metin no: [97-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf kasap dükkânı gediği hisselerinin satışı Kasab [Ma‘rûz] Cennet-mekân adn-âşiyân Sultan Abdülhamid Han -sabbet aleyhi sicâlü’l-gufrân- hazretlerinin evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla ikinci selhhâneye merbût kasab dükkânlarından İstanbul’da Parmakkapı nâm mahâlde vâki‘ ma‘lûmü’l-hudûd bir bâb ve dördüncü [98] selhhâneye merbût kasab dükkânlarından yine İstanbul’da Şehzâdebaşı’nda helvacı dükkânı karşısında manav ve sebzevâtcı dükkânları beynlerinde vâki‘ bir bâb ve beşinci selhhâneye merbût kasab dükkânlarından yine sâlifü’l-beyân Şehzâdebaşı’nda paçacı dükkânına muttasıl bir bâb ve yine İstanbul’da İbrahimpaşa Hamamı kurbünde şekerci dükkânı karşısında çubukçu ve kahveci dükkânları beynlerinde vâki‘ bir bâb ki cem‘an dört bâb kasab dükkânları derûnlarında mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmelerin nısf hisselerine dört kıt‘a mütevellî temessükleri mûceblerince bi’l-icâreteyn mutasarrıf olan es-Seyyid Ahmed Ağa b. es-Seyyid Mehmed meclis-i şer‘-i münîrde li-ebeveyn er karındaşı bâ‘isü’l-i‘lâm kasab es-Seyyid Mehmed Ağa muvâcehesinde hâlâ Kassâbân müdîri es-Seyyid Mehmed Ali Bey ve sâir mazbûtü’l-esâmî kasab ustaları hâzır oldukları hâlde takrîr-i kelâm edip ben ber-vech-i muharrer mutasarrıf olduğum hısas-ı âlât-ı merkūmeyi hüsn-i rızâ ve tayyib-i hâtırım ve ferâğ-ı mu‘teber-i kat‘î ile karındaşım mezbûr es-Seyyid Mehmed Ağa’ya bedel-i ma‘lûm ve makbûz ve müstehlek mukābelesinde bâ-re’y-i mütevellî ferâğ ve tefvîz ve teslîm eylediğimde ol dahi ber-vech-i muharrer tefevvüz ve tesellüm ve kabûl ve hisse-i tevzî‘ini müdîr ve kasab ustaları ma‘rifetleriyle almağa ta‘ahhüd edip fî-mâ ba‘d âlât-ı gedik-i mezkûrun nısf hisse-i merkūmeleri karındaşım mezbûrun hakk-ı müfevvezi olup benim aslâ ve kat‘a alâka ve medhalim kalmamışdır deyü ba‘de’l-ibrâ ve’t-tasdîk gedik-i mezkûrların nısf hisseleri fâriğ-i mezbûr es-Seyyid Ahmed Ağa’nın ferâğından defter-i vakf-ı şerîfde karındaşı mezbûr es-Seyyid Mehmed Ağa uhdesine kayd ve der-dest olan temessük-i mezkûrları hâmişlerine zabt ü tasarrufu’çün taraf-ı vakfdan tahrîr ve temhîr ve yedine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 19 Ra sene [12]58