İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 307 Hüküm no: 262 Orijinal metin no: [98-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Nigahi Kadın ile Küçük Mehmed Ağa ve eşi arasındaki kıymetli eşya ve para davasının sulh ile bitirildiği Eşyâ-i muharrere teslîm ve ahz u kabz [Ma‘rûz] Müteveffâ Na‘lıncızâde el-Hâc Ali Ağa mu‘takalarından olup İstanbul’da Alacahamam civârında Çelebioğlu Alâaddin mahallesinde sâkine sâhibe-i arzuhâl mu‘arrefetü’z-zât Âişe nâm-ı diğer Nigahi Kadın bt. Abdullah meclis-i şer‘-i münîrde Tahmisönü attârlarından derûn-ı arzuhâlde mezkûrü’l-ism Küçük es-Seyyid el-Hâc Mehmed Ağa b. es-Seyyid Mahmud muvâcehesinde hâlâ zevcesi kezâlik mu‘arrefetü’z-zât Şerife Azize Hanım bt. Mustafa hâzıra olduğu hâlde ben mezbûr Küçük es-Seyyid el-Hâc Mehmed Ağa’nın İstanbul’da Uzunçarşı civârında Bezzâz-ı Cedîd mahallesinde vâki‘ menzilinde mâ‘an bir müddet sâkine olup bu esnâda müfârakat etmemle yedimde mâlım olup mecmû‘u üç bin guruş kıymetli bir çift elmaslı zümrüd küpe ve bir elmaslı gül yüzük ve bir elmaslı zümrüd küpe ve bir elmaslı zihgir ve bir gök yâkut yüzük ve mecmû‘u bin beş yüz guruş kıymetli bir Fâris hilâlî koyun sâ‘ati ve bir İngiliz-kârî hilâlî çalar sâ‘at ve beş kıtık memlû köhne çatma yasdık ve iki yün memlû minder ve dört çit döşek ve dört çit yorgan ve beş çit baş yasdığı ve iki sagīr ve kebîr nühâs mangal ve iki beylik mak‘ad ve bir leğen ma‘a ıbrık ve bir câmeşûy leğeni ve bir kebîr tencere ve dört sahan ma‘a kapak ve bir şerbet güğümü ve iki şorba tası ve bir ta‘âm sinisi ve bir tâbe ve bir kadayıf tepsisi ve bir tehî sepet sandık ve bir tehî tahta sandık ve dört çarşaf ve bir köhne nîm nâfe kürk ve iki köhne basma entari ma‘a şalvar ve bir köhne neftî çuka ferâcem menzil-i mezkûrda merkūm Küçük es-Seyyid el-Hâc Mehmed Ağa’nın yedinde kalıp ve mâlımdan bi’l-vekâle âhara bey‘ ü teslîm eylediği bir çift altın bilezik semeninden kable-iftirâki’l-ebdân makbûzu olan iki bin dört yüz otuz altı buçuk guruşun altı yüz otuz altı buçuk guruşunu emrimle umûr-ı ma‘lûmeme harc ü sarf etmekle bâkīsi olan bin sekiz yüz guruşu dahi yedinde kalmağla cümlesini taleb ederim deyü da‘vâ <> eylediğimde ol dahi cevâbında mücevherât ve eşyâ-i muharrere-i mezkûre bi-a‘yânihâ ve meblağ-ı bâkī-i merkūm bin sekiz yüz guruş bi-aynihî yedinde mevcûd olduğunu ikrâr lâkin târih-i i‘lâm senesi Muharremi’l-harâmının yirmi ikinci günü târihiyle müverraha ve hâlâ Ahîçelebi Mahkemesi nâibi müderrisîn-i kirâmdan Kastamonuluzâde Mehmed Sadık Efendi’nin imzâsıyla mümzât bir kıt‘a hüccet-i şer‘iye nâtıka olduğu üzere sen mücevherât-ı mezkûreden sâlifü’l-beyân bir çift elmaslı zümrüd küpe ve bir elmaslı gül yüzüğü bana hibe-i sahîha-i şer‘iye ile hibe ve temlik ve teslîm ve zikr olunan bir hilâlî koyun sâ‘ati ve bir çalar sâ‘at ve beş çatma yasdık ve iki minder ve dört döşek ve dört yorgan ve beş baş yasdığı ve iki mangal ve iki mak‘ad ve bir leğen ma‘a ıbrık ve bir câmeşûy leğeni ve bir tencere ve dört sahan ma‘a kapak ve bir şerbet güğümü ve iki şorba tası ve bir sini ve bir tâbe ve bir tepsi ve bir sepet sandık ve bir tahta sandık ve dört çarşaf ve bir nâfe kürk ve iki basma entari ma‘a şalvar ve bir çuka ferâceyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin bin beş yüz guruşa bana bey‘ ü temlik ve teslîm ve semen-i merkūm bin beş yüz guruş mutâlebesinden dahi zimmetimi kabûlümü hâvî ibrâ ve iskāt etmiş idin deyü ancak mârrü’l-beyân zümrüd küpe ve gül yüzük ve eşyâ-i sâire-i merkūmeden beni def‘e tasaddî ben dahi def‘-i mezkûrunu inkâr etmemle ol-vechile beynimizde ba‘de vukū‘ı’l-münâza‘a bâ-tavassut-ı muslihîn beynimiz ıslâh ve tevfîk olunup mezbûr Küçük es-Seyyid el-Hâc Mehmed Ağa mecmû‘ mücevherât ve eşyâ-i muharrere-i mezkûreyi bi-a‘yânihâ rızâsıyla bana def‘ ü teslîm ben dahi yedinden tamamen ahz u kabz edip ve meblağ-ı bâkī-i merkūm bin sekiz yüz guruşu dahi bana teslîme mezbûr es-Seyyid el-Hâc Mehmed Ağa ta‘ahhüd etmekle meblağ-ı bâkī-i merkūmdan mâ‘adâ bi’l-cümle husûs-ı mezkûra ve zevcesi hâzıra-i mezbûre Şerife Azize Hanım’dan mutâlebe eylediğim dört aded on ikilik adlî altını ve on altı aded diğer beylik memdûhiye altını ve bir top gömlek bezi ve târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden ben mezbûr Küçük es-Seyyid el-Hâc Mehmed Ağa ile zevcesi hâzıra-i mezbûre Şerife Azize Hanım’ın zimmetlerini ibrâ-i âmm-ı sahîh-i şer‘î ile ibrâ ve iskāt eylediğimde onlar dahi zikr olunan husûslara ve sâir cemî‘ hukūk-ı şer‘iyeye müte‘allika âmme-i de‘âvîden kezâlik benim zimmetimi ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl edip bu vechile kat‘-ı münâza‘a eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu] Fî 19 Ra sene [12]58