İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 309 Hüküm no: 263 Orijinal metin no: [98-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin Ağa’nın Mehmed Hüsrev Ağa’ya kefaletten dolayı olan borcunu ödemeye söz verdiği 10000 [guru]ş hüküm [Ma‘rûz] Astarcı esnâfından sâhib-i arzuhâl el-Hâc Mehmed Hüsrev Ağa b. Abdullah şifâhen sâdır olan fermân-ı âlîlerine imtisâlen Çarşamba günleri huzûr-ı hazret-i Fetvâ-penâhî’de ma‘kūd meclis-i şer‘-i münîrde esnâf-ı mezkûre yiğitbaşısı derûn-ı arzuhâlde mezkûrü’l-ism Mehmed Emin Ağa b. Hasan muvâcehesinde esnâf-ı mezkûreden iken bundan mukaddemce fevt olan el-Hâc Mehmed Selim Ağa b. Abdullah zimmetinde bâ-tahvîl semen-i mebî‘-i makbûzdan sekiz bin dokuz guruş ve bilâ-tahvîl yine semen-i mebî‘-i makbûzdan beş bin yüz guruş ki cem‘an alacak hakkım olan on dört bin guruşu hayatında mezbûr el-Hâc Mehmed Selim Ağa’dan sene-i sâbıkā yani bin iki yüz elli yedi senesi şehri Ramazani’l-mübâreki gurresinde İstanbul’da Çukurhan’da odamda mutâlebe eylediğimde mezbûr Mehmed Emin Ağa mezbûr el-Hâc Selim Ağa zimmetinde alacağın olan meblağ-ı mecmû‘-ı merkūm on dört bin guruş benim üzerimedir ve deynimdir deyü meblağ-ı mecmû‘-ı merkūma kabûle mukārin bu vechile mazhar-ı şühûdda kefîl olup hattâ târih-i merkūm ile müverrah karz ünvânıyla deyn-i mezkûru ikrârını nâtık yedime işbu bir kıt‘a temessüğü dahi vermekle meblağ-ı mezkûr on dört bin guruşu kefâlet-i mahkiyesine binâen mezbûr Mehmed Emin Ağa’dan hâlâ taleb ederim deyü da‘vâ ettikde ol dahi cevâbında inkâr etmekle müdde‘î-i mezbûr el-Hâc Mehmed Hüsrev Ağa ber-vech-i muharrer müdde‘âsını beyâna havâle olunup def‘a-i sâniye terâfu‘larında isbât etmek üzere iken mezbûr Mehmed Emin [99] Ağa müdde‘î-i mezbûrun minvâl-i muharrer üzere müdde‘âsını ve meblağ-ı merkūm ber-vech-i muharrer zimmetinde müdde‘î-i mezbûra el-yevm sahîhan deyni olduğunu bi-tamamihi tâyi‘an ve kat‘iyyen ikrâr ü i‘tirâf ettikde müdde‘î-i mezbûr el-Hâc Mehmed Hüsrev Ağa dahi meblağ-ı mezkûr on dört bin guruşun dört bin guruşunu rızâsıyla hatt u tenzîl etmekle bâkīsi olan on bin guruşu dahi bi-hükmi’l-kefâle müdde‘î-i mezbûra bilâ-mumâtale hâlâ edâ ve teslîme mezbûr Mehmed Emin Ağa ta‘ahhüd edip bu vechile kat‘-ı münâza‘a eyledikleri İstanbul Mahkemesi’nden huzûr-ı [âlîlerine i‘lâm olundu] Fî 23 Ra sene [12]58