İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 310 Hüküm no: 264 Orijinal metin no: [99-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Çulhaoğlu Yusuf’un boşandığı karısı Hatice Hatun ile her konuda anlaştığı Eşyâ ve hukūk-ı zevciyetde ibrâ [Ma‘rûz] Vilâyet-i Anadolu’da Karahisar-ı şarkī Kazâsı ahâlisinden olup bâ-mektûb-ı sâmî-i hazret-i Vekâlet-penâhî ihzâr olunan derûn-ı arzuhâlde mezkûrü’l-ism Ekmekçi Çulhaoğlu es-Seyyid Yusuf b. es-Seyyid Hüseyin nâm kimesne meclis-i şer‘-i münîrde zevce-i mutallakası olup hâlâ Niğde sancağında Ürgüp kasabasında Balcı mahallesinde sâkine derûn-ı arzuhâlde mezkûretü’l-ism Hatice Hatun bt. Halil b. Ali’nin li-ebeveyn er karındaşı ve tarafından husûs-ı âti’l-beyânda vekîl olduğu zâtını ârifân kasaba-i mezkûre ahâlisinden Hacı Ahmedoğlu Ali b. Hüseyin ve Eyüboğlu Ali b. İbrahim nâm kimesneler şehâdetleriyle ber-nehc-i şer‘î sâbit olup hâlâ İstanbul’da Küçükayasofya kurbünde Çardaklıhamam civârında sebzevâtcı olan sâhib-i arzuhâl Ali nâm kimesne muvâcehesinde müvekkile-i gāibe-i mezbûre Hatice Hatun yüz elli guruş mehr-i müeccel tesmiyesiyle zevce-i medhûlün-bihâm iken işbu târih-i i‘lâm günü bâyinen tatlîk eylediğimden mâ‘adâ nısf hisse-i şâyi‘ası benim ve nısf hisse-i şâyi‘a-i âharı dahi gāibe-i mezbûrenin yedimizde mülk ve hakkımız olan mahalle-i mezkûrede vâki‘ ma‘lûmü’l-hudûd tahtânî üç bâb oda ve bir ahırı müştemil bir bâb mülk menzilden mâlik olduğum nısf hisse-i şâyi‘a-i <<âharı dahi gāibe-i mezbûrenin>> mezkûrem ile müstakıllen mülküm olan menzil-i mezkûr derûnunda mevcûde iki yün memlû çit döşek ma‘a yasdık ve iki çit yorgan ve bir halı seccâde ve iki kilim ve iki tencere ma‘a kapak ve bir tâbe ve bir tepsi ve beş sahan ma‘a kapak ve bir leğen ma‘a ıbrık ve bir maşraba ve bir kazgan ve bir şıra leğenini tarafeynden bi’l-îcâb ve’l-kabûl bâtten ve sahîhan bi-safkatin vâhidetin bin guruşa müvekkile-i gāibe-i mezbûre Hatice Hatun’a bey‘ ü temlik ve mahâllinde kabza taslît eylediğimde karındaşı ve vekîli mezbûr Ali dahi bi’l-vekâle iştirâ ve temellük ve tasallut [tesellüm] ve kabûl ettiğinden sonra semeni olan meblağ-ı merkūm bin guruşu gāibe-i mezbûrenin bi-şarti’r-rücû‘ emriyle mâlından zevciyet beynimizde kāime iken kendi ile sulbiye kebîre kızım Şerife Fatıma’nın müddet-i ma‘lûmede nafaka ve kisvelerine masrûfu olan bin sekiz yüz elli guruş zimmetimde mütekarrir ve ma‘kūdun-aleyh olan mehr-i müeccel-i mezkûr yüz elli guruş ki cem‘an iki bin guruşun bin guruşunu vekîl-i mezbûr Ali’ye edâ ve teslîm etmemle bâkīsi olan bin guruşa asâleten ve vekâleten ba‘de’t-takas ve’l-mukāssa ve’l-kabûl mebî‘-i mezkûrun tağrîr ve gabnine ve hukūk-ı zevciyete ve ibtidâ-i zevciyetden târih-i i‘lâm-ı merkūma gelince sâir cemî‘ hukūk-ı şer‘iyeye müte‘allika âmme-i de‘âvîden ben gāibe-i mezbûre Hatice Hatun ile karındaşı ve vekîli mezbûr Ali ve diğer li-ebeveyn er karındaşları gāib ani’l-meclis İbrahim’in zimmetlerini kabûle mukārin ibrâ-i âmm-ı sahîh-i şer‘î ile ibrâ ve iskāt eylediğimde mezbûr Ali dahi zikr olunan husûslara ve sâir cemî‘ hukūk-ı şer‘iyeye müte‘allika âmme-i de‘âvîden kezâlik benim zimmetimi kabûlü hâvî ibrâ-i âmm-ı sahîh-i şer‘î ile bi’l-asâle ve müvekkilesi mezbûreye izâfetle bi’l-vekâle ibrâ ve iskāt etmeğin fî-mâ ba‘d mecmû‘-ı menzil-i mezkûr ile eşyâ-i muharrere-i mezkûre müvekkile-i gāibe-i mezbûre Hatice Hatun’un mülk-i mahzı ve hakk-ı sırfı olup benim aslâ ve kat‘a alâka ve medhalim kalmayıp bu vechile kat‘-ı münâza‘a eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu] Fî 24 Ra sene [12]58