İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 311 Hüküm no: 265 Orijinal metin no: [99-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun’un boşandığı kocası Mehmed Ağa’nın menzil hissesi ve kıymetli eşyalarını zabtettiği yolundaki iddiasını ispatlayamadığı Mazbata kaydı [Ma‘rûz] Sâhibe-i arzuhâl mu‘arrefetü’z-zât Havva Hatun bt. Abdullah bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde zevc-i sâbıkı olup zikri âtî vakıf menzilin nısf hisse-i şâyi‘asına vaz‘-ı yedi mütehakkık olan derûn-ı arzuhâlde mezkûrü’l-ism Hancı es-Seyyid Mehmed Ağa b. Mehmed muvâcehesinde mezbûr es-Seyyid Mehmed Ağa ile zevciyet beynimizde kāime iken işbu târih-i i‘lâmdan on dört sene mukaddem İstanbul’da Kumkapı dâhilinde Çadırcı Ahmed Çelebi mahallesinde vâki‘ mâ‘an sâkine olduğum menzilimde mâlımdan kendine li-ecli’l-hıfz îdâ‘ ve teslîm edip târih-i merkūmdan berü yedinde kalan <> elli aded memdûhiye altını ve kırk beş aded memdûhiye nısfiyesi ve iki yüz elli aded fındık altını rub‘iyesi ve rehin etmek için mâlımdan isti‘âre ve kabz ve ba‘dehû yedinde kalan cem‘an dört bin beş yüz guruş kıymetli üç elmas batar iğne ve beş bin guruş kıymetli bir çift elmas başlı altın bilezik ve cem‘an üç bin guruş kıymetli iki elmas gül yüzüğümü bana teslîme ve gāibetü ani’l-meclis Hatice bt. İsmail nâm hatunun bâ-temessük-i mütevellî bi’l-icâreteyn tasarrufunda olan bâ-irâde-i seniyye Hazîne-i Evkāf-ı Hümâyûn tarafından idâre olunan evkāfdan Veziriâ‘zam esbak merhûm Şehîd Mehmed Paşa Vakfı müsakkafâtından İstanbul’da Kadırga Limanı civârında Şehsuvarbey mahallesinde kâin ma‘lûmü’l-hudûd ve’l-müştemilât bir bâb mu‘ayyen vakıf menzilini bin iki yüz elli bir senesi Recebi’l-müreccebinin on üçüncü günü gāibe-i mezbûreden beş bin guruş bedel mukābelesinde nefsimiçin tefevvüze mezbûr es-Seyyid Mehmed Ağa’yı tarafımdan kabûle mukārin tevkîl ve irsâl ettiğimde ol dahi menzil-i mezkûru mütevellî izniyle meblağ-ı merkūm beş bin guruş bedel mukābelesinde benim için gāibe-i mezbûre Hatice Hatun’dan bi’l-vekâle tefevvüz ve kabûl ve bedel-i merkūm beş bin guruşu dahi mâlımdan ve yedimden ahz u kabz ve gāibe-i mezbûreye def‘ ü teslîm etmiş iken menzil-i mezkûrun temessüğünü benimle kendi üzerine nısfiyet üzere tahrîr ettirdiğinden menzil-i mezkûrun nısf hisse-i şâyi‘asını zabt u tasarruf ve vaz‘-ı yed etmekle nısf hisse-i şâyi‘a-i menzil-i mezkûrdan dahi bâ-re’y-i mütevellî keff-i yedine tenbîh olunmak murâdımdır deyü vakf-ı mezkûrun bi’l-meşrûta hâlâ mütevellîsi es-Seyyid Mehmed Şerif Bey tarafından mürsel vekîli el-Hâc İbrahim Ağa hâzır olduğu hâlde da‘vâ ettikde ol dahi cevâbında müdde‘iye-i mezbûre Havva Hatun târih-i merkūmda menzil-i mezkûrun ancak nısf hisse-i şâyi‘asını gāibe-i mezbûre Hatice Hatun’dan kendi için tefevvüze beni vekîl etmekle ben dahi varıp menzil-i mezkûrun nısf hisse-i şâyi‘asını müdde‘iye-i mezbûre için vekâleten ve nısf hisse-i şâyi‘a-i âharını dahi kendi nefsimiçin asâleten gāibe-i mezbûreden ol-mikdâr guruş bedel mukābelesinde bâ-re’y-i mütevellî tefevvüz ve bedel-i merkūm beş bin guruşu dahi kendi mâlımdan gāibe-i mezbûreye def‘ ü teslîm etmemle ol-vechile nısf hisse-i şâyi‘a-i menzil-i mezkûra vaz‘-ı yed ederim deyü müdde‘iye-i mezbûre Havva Hatun’un ber-minvâl-i meşrûh müdde‘âlarını inkâr etmekle müdde‘iye-i mezbûre da‘vâ-yı mezkûrelerini şehr-i sâbık yani Saferi’l-hayr’ın yirmi beşinci günü beyâna havâle olunup tarafeyn bir dahi zuhûr etmemeleriyle henüz da‘vâlarına faysal verilmediği vekāyi‘-i şer‘iye kâtibimiz cerîdesinde mazbût olduğu imtisâlen li’l-emri’l-âlî İstanbul Mahkemesi’nden huzûr-ı [âlîlerine i‘lâm olundu] Fî 26 min-Ra sene [12]58