İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 313 Hüküm no: 266 Orijinal metin no: [99-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Komşularını rahatsız eden Mustafa b. Ali ve karısının bulundukları mahalleden çıkarılmaları Mahalle ihrâcı [Ma‘rûz] Ashâb-ı arzuhâl İstanbul’da Hocapaşa civârında Nallımescid mahallesi İmâmı el-Hâc Numan Efendi ve muhtârları es-Seyyid Ali Ağa ve Mustafa Ağa ve ahâlisinden hâlâ Müdîr-i İmâret-i Mihrimah Sultan İbrahim Ağa ve Ekmekçi el-Hâc Ahmed Ağa ve Çavuş Mustafa Ağa ve Yazıcı Mustafa Efendi ve Yorgancı Ahmed Ağa ve Çavuş Mehmed Ağa ve Hafız Mehmed Efendi ve diğer Hafız Mehmed Efendi ve Mustafa Ağa ve Çavuş İbrahim Ağa ve sâir mazbûtü’l-esâmî kimesneler meclis-i şer‘-i münîrde mahalle-i mezkûre sâkinlerinden derûn-ı arzuhâlde mezkûrü’l-ism Câmeşûycu Trabzonî Mustafa b. Ali ve zevcesi mu‘arrefetü’z-zât Kengirili (Çankırılı) Zeliha Hatun bt. Mehmed muvâcehelerinde zevcân-ı mezbûrân Mustafa ve Zeliha Hatun mahalle-i mezkûrede sâkinler olup lâkin kendi hâllerinde ırz ve edebleriyle mukayyedler olmayıp hadîdü’l-lisân ve bed-zebân olmalarıyla dâimâ her birimizi ta‘cîz ve tekdîr ve ta‘zîri mûcib elfâz-ı kabîha ve şutûm-ı galîza ile bi’l-muvâcehe şetm edip ve bi’d-defa‘ât kendilere nush u pend olunmuş ise de aslâ ısgā etmeyip ısrâr etmeleriyle zevcân-ı mezbûrânın vech-i meşrûh üzere ictisâr eyledikleri harekât-ı gayrı marzıyelerine tahammül ve tâkatımız kalmamışdır deyü muvâcehelerinde iştikâ ve sû’-i hâllerini bi’l-ittifâk ihbâr ve mahalle-i mezkûreden dahi hurûclarını istid‘â ettikleri İstanbul Mahkemesi’nden huzûr-ı [âlîlerine i‘lâm olundu] Fî 24 Ra sene [12]58