İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 313 Hüküm no: 267 Orijinal metin no: [99-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey’in tecil edilen borçlarını ödemeye söz verdiği Tecîl [Ma‘rûz] Arzuhâl sâhibleri Keresteci İspiro v. Kiryako ve Mismârcı Yuvan v. Vasil ve Doğramacı Balıkçıoğlu Bedos v. Kiryako ve Kapıalatcı? [100] Artin v. Mihail zimmîler meclis-i şer‘-i münîrde İstanbul’da Ebu’l-feth Sultan Mehmed Han -aleyhi’r-rahmetü ve’l-gufrân- Câmi‘-i şerîfi civârında Harâccı Muhyiddin mahallesinde sâkin sâbıkā İzmid mütesellimi derûn-ı arzuhâlde mezkûrü’l-ism Mehmed Bey b. el-müteveffâ el-Hâc Yakub Ağa muvâcehesinde evvelen mersûm İspiro zimmî takrîr-i kelâm edip benim mûmâ-ileyh Mehmed Bey zimmetinde bundan mukaddem mahalle-i mezkûrede vâki‘ bir bâb konağı müceddeden binâ ve inşâ eylediği esnâda mâlımdan ve yedimden iştirâ ve kabz eylediği ecnâs ve aded ve fiyâtı beynimizde ma‘lûm kereste semenlerinden işbu sene-i mübâreke Muharremi’l-harâm’ın yirmi beşinci günü târihiyle müverraha yedime verdiği bir kıt‘a memhûr pusula mûcebince on altı bin yüz elli guruşdan bâkī on iki bin beş yüz guruş ve sâniyen mesfûr Yuvan zimmî takrîr-i kelâm edip benim dahi mîr-i mûmâ-ileyh zimmetinde mâlımdan ve yedimden iştirâ ve kabz eylediği vezn ve aded ve fiyâtı beynimizde ma‘lûm mismâr ve sac ve mermer kireç ve küfe semenlerinden şehr-i mezkûrun yirmi dokuzuncu günü târihiyle müverrah kezâlik yedime verdiği bir kıt‘a memhûr pusula mûcebince yedi bin dokuz yüz doksan yedi buçuk guruş on paradan bâkī beş bin beş yüz guruş ve sâlisen mersûm Bedos zimmî takrîr-i kelâm edip benim dahi mîr-i mûmâ-ileyh zimmetinde mâlımdan ve yedimden iştirâ ve kabz eylediği ma‘lûmü’z-zira‘ ve’l-fiyât doğrama semeninden şehri merkūmun yirmi beşinci günü târihiyle müverrah kezâlik yedime verdiği bir kıt‘a memhûr pusula mantûkunca altı bin dört yüz guruşdan bâkī dört bin dört yüz guruş ve râbi‘an mersûm Artin zimmî dahi takrîr-i kelâm edip benim dahi mîr-i mûmâ-ileyh zimmetinde mâlımdan ve yedimden iştirâ ve kabz eylediği aded ve fiyâtı beynimizde ma‘lûm pencere demir ve dökmeleri ve raht takımları semenlerinden şehr-i sâbık Saferi’l-hayr’ın yedinci günü târihiyle müverrah kezâlik yedime verdiği bir kıt‘a memhûr pusula mûcebince iki bin altı yüz yetmiş yedi buçuk guruş on iki paradan bâkī bin üç yüz otuz guruş ki cem‘an yirmi üç bin yedi yüz otuz guruş alacak hakkımız olmağla meblağ-ı mecmû‘-ı merkūmun beş bin yedi yüz otuz guruşunu şehri âtî gurresinde ve bâkīsi olan on sekiz bin guruşu dahi gurre-i mezkûreden beher şehr üçer bin guruşdan altmış ayda tamamen bize edâ ve teslîm etmek üzere mûmâ-ileyh es-Seyyid Mehmed Bey’i tecîl ve taksît eylediğimizde ol dahi kabûl ve ber-minvâl-i meşrûh edâ-i deyne ve biz dahi ahz ettikçe alacağımıza göre beynimizde iktisâma tarafeynden her birimiz ta‘ahhüd edip bu vechile kat‘-ı münâza‘a eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu] Fî 15 Ra sene [12]58