İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 314 Hüküm no: 268 Orijinal metin no: [100-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Edhem Ağa’nın borcunu ödemesi 1047 [guru]ş hüküm [Ma‘rûz] Şâm-ı şerîf tüccârından sâhib-i arzuhâl Abdullah Bey b. İsmail meclis-i şer‘-i münîrde derûn-ı arzuhâlde mezkûrü’l-ism Çekmececi İbrahim Edhem Ağa b. Mehmed Ali muvâcehesinde benim gāibân ani’l-meclis Kayıkçı Silivrili es-Seyyid Mehmed İzzet b. Abdullah ve şerîki es-Seyyid Üveys b. Abdurrahman nâm kimesneler zimmetlerinde bin iki yüz elli altı senesi şehri Ramazani’l-mübârekinin üçüncü günü bâ-tahvîl mâlımdan ve yedimden mâ‘an iktirâz ve kabz ve umûrlarına sarfla istihlâk eyledikleri iki bin doksan dört guruş alacak hakkım olup meblağ-ı merkūm iki bin doksan dört guruşa mezbûr İbrahim Ağa târih-i merkūmda tarafeynden bi’l-emr ve’l-kabûl kefâlet-i mutlaka ile kefîl ve zâmin oldukdan sonra bin kırk yedi guruşunu gāibân-ı mezbûrân bana edâ etmeleriyle bâkīsi olan bin kırk yedi guruşu dahi kefâlet-i mahkiyesine binâen mezbûr İbrahim Edhem Ağa’dan hâlâ taleb ederim deyü da‘vâ ettikde ol dahi cevâbında kaziyye minvâl-i meşrûh üzere olduğunu bi-tamamihâ tâyi‘an ve kat‘iyyen ikrâr ü i‘tirâf etmeğin mûcebince meblağ-ı bâkī-i merkūm bin kırk yedi guruşun müdde‘î-i mezbûr Abdullah Bey’e edâsıyla mezbûr İbrahim Edhem Ağa ilzâm olunduğu İstanbul Mahkemesi’nden huzûr-ı [âlîlerine i‘lâm olundu] Fî 22 Ra sene [12]58