İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 315 Hüküm no: 269 Orijinal metin no: [100-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Karabet’in Kayserili Agop’a olan borcunu ödemesi 2000 [guru]ş bedel-i sulhdan hüküm [Ma‘rûz] Arzuhâl eden Poliçeci Kayserili Agop v. Ağya zimmî meclis-i şer‘-i hatîrde derûn-ı arzuhâlde ismi mastûr Mübâya‘a Sarrâfı Eğinli Karabet v. Mardıros zimmî muvâcehesinde mersûm Karabet zimmî zimmetinde sene-i sâbıkā Muharremi’l-harâmı gurresinde İstanbul’da Vezirhanı’nda odamda mâlımdan ve yedimden iktirâz ve kabz ve umûruna sarfla istihlâk eylediği beş bin guruş alacak hakkım olmağla meblağ-ı mezkûru sarrâf-ı mersûmdan hâlâ taleb ederim deyü da‘vâ ettikde ol dahi cevâbında inkâr etmekle müdde‘î-i mersûm da‘vâ-yı mezkûresini şehri sâbık Saferi’l-hayr’ın on dokuzuncu günü beyâna havâle olunup ba‘dehû def‘a-i sâniye terâfu‘larında müdde‘î-i mersûm Agop zimmî ben tasaddî eylediğim da‘vâ-yı mezkûremden işbu târih-i i‘lâm şehrinin on beşinci günü İstanbul’da Kumkapı dâhilinde Ermeni kilisesi civârında vâki‘ berber dükkânında mersûm Karabet zimmî ile an-inkârin kat‘an-li’n-nizâ‘ iki bin guruş üzerine sulh olduğumda ol dahi sulh-ı mezkûru kabûl ve bedel-i sulh-ı mezkûr zimmetinde bana deyni olduğunu ikrâr ve târih-i merkūm ile müverrah karz ünvânıyla deyn-i mezkûru ikrârını nâtık yedime Ermeniyyü’l-imlâ işbu bir kıt‘a tahvîli dahi vermekle bedel-i sulh-ı mezkûr iki bin guruşu mesfûr Karabet zimmîden hâlâ taleb ederim deyü da‘vâ ettikde ol dahi istintâk olundukda cevâbında kaziyye minvâl-i meşrûh üzere olduğunu bi-tamamihâ tâyi‘an ve kat‘iyyen ikrâr ü i‘tirâf edip lâkin ben müdde‘î-i mezbûr ile minvâl-i muharrer üzere sulh olup tahvîl-i mezkûru dahi yedine verdim ise de müdde‘î-i mersûmdan bir akçe ve bir habbe ahz etmediğime binâen sulh-ı mezkûra nâdim olmamla öyle olucak müdde‘î-i mersûm târih-i merkūmda bana ol-mikdâr guruş karz verdiğini isbât etsin ve isbât edemez ise bana yemîn verdirsin deyü îrâd eylediği kelâmı meşrû‘ ve iltifâta şâyân olmadığı kendine tefhîm olunmağla mûcebiyle bedel-i sulh-ı mezkûr iki bin guruşu müdde‘î-i mersûm Agop zimmîye edâ ve teslîme mesfûr Karabet zimmîye tenbîh olunduğu İstanbul Mahkemesi’nden huzûr-ı [âlîlerine i‘lâm olundu] Fî 28 Ra sene [12]58