İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 316 Hüküm no: 270 Orijinal metin no: [100-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Bey’in Mehmed Seyda Beyefendi’ye olan borcunu ödemesi 2500 [guru]ş hüküm [Ma‘rûz] Hâcegân-ı Dîvân-ı hümâyûndan ve Mektûbî-i Sadr-ı Âlî hulefâsından bâ‘isü’l-i‘lâm Mehmed Seyda Beyefendi b. Mehmed Âtıf Bey meclis-i şer‘-i münîrde hâlâ eniştesi İsmail Bey b. Mahmud muvâcehesinde eniştem mezbûr İsmail Bey’in vâlidesi gāibetü ani’l-meclis Zeberced Kadın bt. Abdullah zimmetinde yedime verdiği bin iki yüz elli altı senesi şehri Rebî‘ülâhirinin yirmi birinci günü târihiyle müverrah işbu bir kıt‘a deyn tahvîli mantûkunca cihet-i karzdan alacak hakkım olan iki bin beş yüz guruşa oğlu mezbûr tarafeynden bi’l-emr ve’l-kabûl kefâlet-i mutlaka-i sahîha ile kefîl ve zâmin olmağla meblağ-ı merkūm iki bin beş yüz guruşu kefâlet-i mahkiyesine binâen mezbûr İsmail Bey’den hâlâ taleb ederim deyü da‘vâ ettikde ol dahi cevâbında kaziyye minvâl-i meşrûh üzere olduğunu bi-tamamihâ tâyi‘an ve kat‘iyyen ikrâr ü i‘tirâf etmeğin alâ-mûcibi ikrârihâ meblağ-ı mezkûr iki bin beş yüz guruşun bi-hükmi’l-kefâleti müdde‘î-i mûmâ-ileyh es-Seyyid Mehmed Seyda Beyefendi’ye edâsıyla mezbûr İsmail Bey ilzâm olunduğu İstanbul Mahkemesi’nden huzûr-ı âlîlerine i‘lâm olundu. El-emrü li- men-lehü’l-emr. Fî 13 C sene 1258