İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 318 Hüküm no: 272 Orijinal metin no: [101-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Usulüne uygun olarak satılan gedik hisselerinin geri alınmasının mümkün olmadığı Berber dükkânı nizâ‘ına dâir [Ma‘rûz] Mübârek ve mes‘ûd rikâb-ı kamer-tâb-ı merâhim-nisâb-ı şâhâneye takdîm-i arzuhâl eden mu‘arrefetü’z-zât Şerife Zeliha Hatun bt. el-müteveffâ Kahveci es-Seyyid İbrahim Edhem b. Mustafa vâlidesi kezâlik mu‘arrefetü’z-zât Hatice Hatun bt. Abdullah hâzıra olduğu hâlde bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde zikri âtî vakıf gedik âlâtının rub‘ hisse-i şâyi‘asına bâ-temessük-i mütevellî bi’l-icâreteyn mutasarrıf ve vaz‘-ı yedi mütehakkık olan derûn-ı arzuhâlde mezkûrü’l-ism teba‘adan Mustafa Ağa b. Mehmed Memiş muvâcehesinde İstanbul’da Bahçekapısı dâhilinde vâki‘ merhûme ve mağfûrun-lehâ Turhan Hatice Vâlide Sultan -tâbe serâhâ- hazretlerinin câmi‘-i şerîfleri avlusu ebvâbından Balıkpazarı kapısından on dördüncü bir bâb berber dükkânı derûnunda mevcûde beyne’l-esnâf gedik ta‘bîr olunur Evkāf-ı Haremeyn-i Muhteremeyn müstagellâtından âlât-ı lâzıme-i ma‘lûmenin nısf hisse-i şâyi‘asına babam müteveffâ-yı mezbûr es-Seyyid İbrahim Edhem’in intikālinden tasarrufumda iken ben ber-vech-i muharrer mutasarrıfe olduğum nısf hisse-i şâyi‘a-i gedik-i merkūmu zeyl-i arzuhâlde mastûr defter-i vakıfdan muhrec derkenâr nâtık olduğu üzere bin iki yüz elli altı senesi şehri Rebî‘ülâhirinin yirmi üçüncü günü vâlidem hâzıra-i mezbûre Hatice Hatun ile zevcim Mehmed b. Süleyman’a ale’l-iştirâki’s-seviyy bâ-re’y-i mütevellî ferâğ ve tefvîz onlar dahi ber-vech-i muharrer tefevvüz ve kabûl ve nısf hisse-i şâyi‘a-i merkūmeyi asâkir-i muntazama-i şâhâne yüzbaşılarından gāib ani’l-meclis diğer Mustafa Ağa b. İbrahim’e olan cihet-i karzdan iki bin beş yüz guruş deynleri mukābelesinde gāib-i mezbûra vefâen ve bâ-izn-i mütevellî ferâğ ve tefvîz ve ba‘dehû zevcim mezbûr deyn-i mezkûrun nısfı olup kendiden iktizâ eden bin iki yüz elli guruşu dâyini mezbûra edâ ile âlât-ı gedik-i merkūmdan rub‘ hisse-i şâyi‘asını zabt etmeksizin bilâ-veled fevt ve rub‘ hisse-i şâyi‘a-i gedik-i merkūm mahlûl ve cânib-i vakf-ı mezkûra âid oldukda sene-i sâbıkā Zi’lka‘detü’ş-şerîfesinin on birinci günü rub‘ hisse-i şâyi‘a-i gedik-i merkūm müteveffâ-yı mezbûrun mahlûlünden beş bin guruş mu‘accele-i makbûza ve yevmî bir akçe icâre-i müeccele ile mezbûr Mustafa Ağa’ya bâ-temessük cânib-i vakf-ı mezbûrdan îcâr ve tefvîz ve deyn-i merkūmun nısfı olup zevcim müteveffâ-yı mezbûrdan îcâb eden meblağ-ı merkūm bin iki yüz elli guruş dahi aslâ terekesi olmadığından dâyini gāib-i mezbûr diğer Mustafa Ağa’ya nizâmı mûcebince taraf-ı vakf-ı mezkûrdan edâ ve teslîm olunup ol-vechile rub‘ hisse-i şâyi‘a-i gedik-i merkūm el-yevm mezbûr Mustafa Ağa’nın taht-ı tasarrufunda olmağla vaz‘-ı yed eder lâkin babam mezbûr es-Seyyid İbrahim Edhem’in bir takım kimesnelere deyni olup kable’l-edâ fevt olup ve aslâ terekesi dahi olmayıp ben târih-i merkūmda mutasarrıfe olduğum nısf hisse-i şâyi‘a-i gedik-i merkūmu vâlidem hâzıra-i mezbûre ile zevcim mezbûr Mehmed’e fâriğa olduğumda zevcim mezbûr babam müteveffâ-yı mezbûrun deynlerini <> ashâbına kendi mâlından edâ edecek idi sonra edâ etmeksizin fevt olup babam müteveffâ-yı mezbûrun dâyinleri beni mütâlebeden hâlî olmamalarıyla öyle olucak babam müteveffâ-yı mezbûrun deynlerini edâ etmek için rub‘ hisse-i şâyi‘a-i gedik-i merkūmdan keff-i yed birle bana teslîm etmek üzere mezbûr Mustafa Ağa’ya cebr olunmak murâdımdır deyü tasaddî eylediği da‘vâsı takrîr-i meşrûhu üzere şer‘an ve kānûnen mesmû‘a ve iltifâta şâyân olmadığı müdde‘iye-i mezbûre Şerife Zeliha Hatun’a tefhîm ve mûcebince da‘vâ-yı mezkûresiyle mezbûr Mustafa Ağa’ya bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî-selhi Ra sene 1258