İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 319 Hüküm no: 273 Orijinal metin no: [101-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Halife’nin uhdesine aldığı müezzinlik cihetinin bedel-i ferağını ödediği Müezzin ciheti nizâ‘ına dâir [Ma‘rûz] Sâhib-i arzuhâl es-Seyyid Mehmed Abdüllatif Efendi ve es-Seyyid Mehmed Emin Efendi ibney el-müteveffâ Hafız Mehmed meclis-i şer‘-i münîrde derûn-ı arzuhâlde mezkûrü’l-ism es-Seyyid Hüseyin Halîfe b. Mustafa muvâcehesinde İstanbul’da Altımermer nezdinde vâki‘ merhûm Koruk Mahmud Mescid-i şerîfi’nin yevmî iki akçe vazîfe ile müezzinlik ciheti babamız müteveffâ-yı mezbûr Hafız Mehmed’in intikālinden ale’l-iştirâki’s-seviyy tasarrufumuzda iken biz cihet-i mezkûreyi sene-i sâbıkā şehri Rebî‘ülâhirinin on sekizinci günü hüsn-i rızâmızla bin guruş bedel mukābelesinde mezbûr es-Seyyid Hüseyin Halîfe’ye ferâğ ve kasr-ı yed ol dahi tefevvüz ve kabûl edip cihet-i mezkûre ferâğ ve kasr-ı yedimizden mezbûr es-Seyyid Hüseyin Halîfe üzerine tevcîh ve yedine bir kıt‘a ruûs-ı hümâyûn i‘tâ olunmuş ise de bedel-i mezkûrun ancak iki yüz elli guruşunu bize teslîm edip bâkīsi olan yedi yüz elli guruşu vermemekle suâl olunup bedel-i ferâğ-ı merkūmun bâkīsi olan meblağ-ı mezkûr yedi yüz elli guruşu dahi bize teslîme mezbûr es-Seyyid Hüseyin Halîfe’ye tenbîh olunmak murâdımızdır deyü da‘vâ ettiklerinde ol dahi cevâbında müdde‘iyân-ı [102] mezbûrân mutasarrıf oldukları cihet-i mezkûreyi târih-i merkūmda ancak sekiz yüz elli guruş mukābelesinde bana ferâğ ve kasr-ı yed ve bedel-i merkūm sekiz yüz elli guruşu dahi tamamen kendilere def‘ ü teslîm etmiş idim dediğinden mâ‘adâ müdde‘iyân-ı mezbûrânın takrîr-i meşrûhları üzere tasaddî eyledikleri bâkī bedel-i ferâğ da‘vâları meşrû‘a olmayıp mûcebiyle müdde‘iyân-ı mezbûrân es-Seyyid Mehmed Abdüllatif Efendi ve es-Seyyid Mehmed Emin Efendi da‘vâ-yı mezkûreleriyle mezbûr es-Seyyid Hüseyin Halîfe’ye bî-vech mu‘ârazadan men‘ olundukları İstanbul Mahkemesi’nden huzûr-ı [âlîlerine i‘lâm olundu] Fî 27 min-Ra sene [1]258