Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 461 Hüküm no: 549 Orijinal metin no: [90b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf Ağa b. Ahmed’in mülk menzil ve vakıf arsasını Hasan Efendi’ye satması Vilâyet-i Anadolu’da Bolu sancağında Kızılbel kazâsına tâbi‘ Emre Sultan nâm karyede sâkin Yusuf Ağa b. Ahmed tarafından zikri âtî menzile bey‘ ve kabz-ı semene vekîl olup yine mezkûrûn etbâ‘ından Mustafa Beşe b. Oruc ve Hüseyin b. Mehmed nâm kimesneler şehâdetleriyle şer‘an vekâleti sâbite olan karındaşı Mehmed Ağa meclis-i şer‘-i şerîf-i enverde ve mahfil-i dîn-i münîf-i ezherde yine müvekkil-i mezbûrun birâderi işbu bâ‘isü’l-kitâbü’l-hâlî ani’l-irtiyâb umdetü’l-müderrisînü’l-kirâm Hasan Efendi mahzarında bi’l-vekâle ikrâr-ı tâm ve takrîr-i kelâm edip işbu yedimde olan hüccet-i şer‘iyyede tastîr ve tahrîr olduğu üzre müvekkilim mezbûr Yusuf Ağa’nın silk-i mülk-i sahîhinde münselik olup mahmiye-i İstanbul’da Nevbethâne kurbunda Dâye Hâtun mahallesinde vâki‘ tarafeyni ve bir tarafı tarîk-i hâs ve bir tarafı tarîk-i âma müntehî olup hâriciyyesinde beş bâb fevkānî oda ve iki sofa ve bir abdest musluğu ve kenîf ve vustâda üç bâb oda ve bir kiler ve tahtında bir bâb ahır ve bir matbah ve bi’r-i mâ ve havlu ve dâhiliyyesi üç bâb fevkānî oda ve köşk ve iki sofa ve bir câmekân odası ve bir kubbeli hamam ve iki vustâî oda ve bir matbah ve altında vâki‘ bir bâb otluk anbarı ve bi’r-i mâ ve kenîf ve bir dib erik ağacı ve havluyu müştemil olup arsasının temessük mûcebince mikdâr-ı mu‘ayyeninin merhûm Kemal Paşa vakfına senede üç yüz altmış akçe mukāta‘ası olup mâ‘adâ arsa ve ebniyesi mülk olan menzil vekâlet-i mahkiyem hasebiyle mûmâ-ileyh Hasan Efendi’ye dört bin esedî guruşa tarafından îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk ve teslim ve ol dahi iştirâ ve kabûl ve temellük ve tesellüm eyledikden sonra semeni olan meblağ-ı mezbûr dört bin esedî guruşu yedinden bi’t-tamâm ve’l-kemâl ahz u kabz eyledim ba‘de’l-yevm menzil-i mahdûd mûmâ-ileyh Hasan Efendi’nin mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Es-Seyyid Mehmed Efendi b. İbrahim, Ali Bey b. ( ), es-Seyyid Hasan b. es-Seyyid Hüseyin, Mehmed b. el-Hâc Satılmış, İbrahim Çelebi b. Ahmed, Mustafa Çelebi b. Abdurrahman, Mustafa Çelebi b. el-Hâc Ahmed, Mehmed b. İdris.