Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 462 Hüküm no: 550 Orijinal metin no: [90b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihrimah Hatun bt. Abdurrahman Vakfı’na ait menzilin icâreteynli vakfa dönüştürerek kiracısı tarafından tamiri Husûs-ı âti’z-zikrin mahallinde keşf ve tahrîr ve tahmîn ve takvîmi bâbında sâdır olan fermân-ı âlîşânîye imtisâlen bu def‘a hâssa mi‘mârlarından Mustafa Halîfe b. Dede Mehmed Dârü’l-hilâfeti’l-aliyye Kostantıniyye el-mahmiyye ebvâbından Ayvansaray kapısı dâhilinde Koca Mustafa Paşa mahallesinde sâhibetü’l-hayr merhûme Mihrimâh Hâtun bt. Abdurrahman’ın evvelâ süknâsı kendi nefsine ba‘dehû tasarrufu mu‘takı Hüseyin b. Abdullah ba‘dehû mezbûr Hüseyin’in evlâdına ve evlâd-ı evlâd ve ba‘de’l-inkırâz mahalle-i mezbûr kurbunda Toklu Baba zâviyesi fukarâsına meşrûta vakıf menzil-i lâhıku’l-evsâfın üzerine varıp zeyl-i sütûrda isimleri mastûr müslimîn huzûrlarında akd-i meclis-i şer‘-i Muhammediyye olundukda menzil-i mevkūf-ı mezbûrun kıbel-i şerî‘at-i garrâdan bâ hüccet-i şer‘iyye hasbî mütevellîsi olan Hoca Ali imâmı Ali Efendi b. el-Hâc Mehmed meclis-i ma‘kūd-ı mezbûrda, mu‘tak-ı mezbûr Hüseyin’in sulbî oğlu ve menzil-i mezkûrûn ber mûceb-i şart-ı vâkıf tasarrufuna meşrûtün-leh olup vilâyet-i Anadolu’da Yaylakābad kazâsı müzâfâtından Elmalı nâm karyede sâkin Ömer b. Hüseyin hâzır olduğu hâlde bâ‘isü hâze’r-rakam el-Hâc Ömer Beşe b. Abdullah mahzarında bast-ı merâm ve takrîr-i kelâm edip mahalle-i mezbûrda vâki‘ mütevellîsi olduğum işbu bir tarafdan mezbûr el-Hâc Ömer Beşe mülkü ve bir tarafdan tarîk-i hâs ve bir tarafdan tarîk-i âm ile mahdûd hükm-i nukzda iki bâb fevkānî harâb odaları müştemil menzilin vech-i meşrûh üzre meşrûtün-lehi olan işbu hâzır bi’l-meclis Ömer karye-i mezbûrda sâkin olmağla menzil-i mezbûrân on üç seneden mütecâviz hâlî ve mu‘attal kalıp ebniye-i mevcûdesi bi’l-külliye harâb ve mâil-i türâb olup cânib-i vakıfla imâret ve meremmetine mu‘ayyen bir habbe olmayıp ve vakfiye-i ma‘mûlün-bihâdan tasarrufu meşrûta olduğu mastûr ve mukayyed olmağın icâreteyn-i ma‘hûdeteyn ile îcâr olunmak cânib-i vakfa her vechile evlâ olunmasını iltimâs etmekle menzil-i mahdûd-ı mezkûru sûk-ı sultânîde ba‘de’l-müzâyede ve gıbbe’l-inkıtâ‘i’r-rağbe icâre-i mu‘accele-i ma‘lûme ve ecr-i misli olan beher şehr on akçe ecr-i müeccele [91a] ile mezbûr el-Hâc Ömer Beşe’ye tevliyyetim hasebiyle bi’l-izni’ş-şer‘î îcâr ve yedinde zabt ve tasarrufiyçün temessük vermişdim el-hâletü hâzihî mezbûr el-Hâc Ömer Beşe menzil-i mevkūf-ı mezbûru îcâr mu‘accelesine mahsûb olmak üzre nukzuyla mahlût kendi malıyla imâret ve meremmet etmek murâd etmekle ben dahi vech-i meşrûh üzre imâret ve meremmete izin verdim hâlâ menzil-i mahdûd-ı mezkûrûn arsası mesâha ve nukz-ı mevcûdu tahmîn ve takvîm olunmak matlûbumdur dedikde gıbbe’t-tasdîki’l-mu‘teber mi‘mâr-ı mezbûr menzil-i mezkûrûn arsasını mesâha edip tûlen on beş buçuk ve arzen altı buçuk bi hesâb-ı terbî‘î yüz bir zirâ‘ arsa üzerine hükm-i nukzuyla olan kırk zirâ‘ ebniye ve seksen dört zirâ‘ taş duvarın kıymeti min haysi’l-mecmû‘ iki bin sekiz yüz seksen akçe olduğuna mi‘mâr-ı mezbûr ve sâir sikāt-ı makbûletü’l-kelimât ehl-i vukūf icmâ‘ ve ittifâk etmeğin mâ vaka‘a bi’t-taleb ketb olundu. Fi’l-yevmi’s-sâmin min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: El-Hâc Ali Efendi el-İmâm, Mehmed Çavuş b. Abdullah, Musa Beşe b. İbrahim, el-Hâc Ahmed el-Bevvâb, Halil Bey.