İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 324 Hüküm no: 279 Orijinal metin no: [103-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galata’da Çeşme Meydanı’nda bulunan vakıf kasap dükkânına ait gedik hisselerinin satışı Kasab [Ma‘rûz] Cennet-mekân adn-âşiyân Sultan Abdülhamid Han -aleyhi sicâlü’l-gufrân- hazretlerinin evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla beşinci selhhâneye merbût kasab dükkânlarından mahrûse-i Galata’da Çeşme Meydanı’nda mekteb altında vâki‘ ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmenin bir kıt‘a temessük-i mütevellî mantûkunca sülüs hissesine bi’l-icâreteyn mutasarrıf olan Mehmed Şemsi Kapudan b. Ali Çavuş ve sülüsân hissesine kezâlik bi’l-icâreteyn mutasarrıfe olan vâlidesi Zeliha Hatun bt. el-Hâc Mehmed taraflarından husûs-ı âti’l-beyânda ikrâra vekîlleri olduğu zât-ı mezbûreyi ârifân Kolağası es-Seyyid Ali Ağa b. Ebûbekir ve Yüzbaşı İbrahim Ağa b. Yakub nâm kimesneler şehâdetleriyle sâbit olan Ali Ağa b. Hüseyin meclis-i şer‘-i münîrde Tophâne-i âmirede mirlivâ ve bâ‘isü’l-i‘lâm Ahmed Paşa b. Hüseyin tarafından husûs-ı âtîde tasdîka vekîl-i şer‘îsi Kasablar Yazıcısı es-Seyyid el-Hâc Mehmed Haşim Efendi b. es-Seyyid el-Hâc Mehmed Emin muvâcehesinde hâlâ Kassâbân müdîri es-Seyyid Mehmed Ali Bey ve sâir mazbûtü’l-esâmî kasab ustaları hâzır oldukları hâlde bi’l-vekâle takrîr-i kelâm edip müvekkillerim mezbûrân Mehmed Şemsi Kapudan ve vâlidesi Zeliha Hatun ber-vech-i muharrer iştirâken mutasarrıf olduğumuz âlât-ı gedik-i merkūmu hüsn-i rızâ ve tayyib-i hâtırımız ve ferâğ-ı mu‘teber-i kat‘î ile müvekkil-i mûmâ-ileyh Ahmed Paşa’ya bedel-i ma‘lûm ve makbûz ve müstehlek mukābelesinde bâ-re’y-i mütevellî ferâğ ve tefvîz eylediğimizde ol dahi ber-vech-i muharrer tefevvüz ve kabûl edip fî-mâ ba‘d âlât-ı gedik-i merkūm mûmâ-ileyh Ahmed Paşa’nın hakk-ı müfevvazı olup bizim aslâ ve kat‘a alâka ve medhalimiz kalmamışdır dediler deyü bi’l-vekâle ba‘de’l-ikrâr ve’t-tasdîk gedik-i merkūm fâriğân-ı mezbûrân Mehmed Şemsi Kapudan ve vâlidesi Zeliha Hatun’un ferâğlarından defter-i vakf-ı şerîfde mûmâ-ileyh Ahmed Paşa’nın müstakıllen uhdesine kayd ve der-dest olunan temessük-i mezkûr hâmişine zabt u tasarrufi’çün [104] taraf-ı vakfdan tahrîr ve temhîr ve yedine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 5 R sene [12]58