İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 327 Hüküm no: 281 Orijinal metin no: [104-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galata’ya tâbi Dörtyolağzı’nda bulunan vakıf kasap dükkânı gedik hisselerinin satışı Kasab [Ma‘rûz] Cennet-mekân huld-âşiyân Sultan Abdülhamid Han -aleyhi’r-rahmetü ve’l-gufrân- hazretlerinin evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla altıncı selhhâneye merbût kasab dükkânlarından mahrûse-i Galata’ya muzâfe kasaba-i Kasımpaşa’da Tersâne kapısı dâhilinde Dörtyolağzı’nda köşe başında vâki‘ bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmenin nısf hissesinin bi’l-icâreteyn mutasarrıfı Halil Ağa b. Ömer fevt olup ber-vech-i muharrer mutasarrıf olduğu nısf hisse-i gedik-i merkūm sulbî kebîr evlâdı es-Seyyid Hüseyin ve es-Seyyid Osman ve Şerife Âişe Hatun ve hâlâ vilâyet-i Anadolu’da Eğin Kazâsı’na tâbi‘ Puşadi nâhiyesine muzâfe İliç karyesinde sâkineler Şerife Hafize ve Şerife Ümmügülsüm ve Şerife Hatice hatunlara isdâsen intikāl edip ba‘dehû mezbûr es-Seyyid Osman dahi fevt olup nısf hisse-i gedik-i mezkûrdan südüs hisse-i müntakılesi hâlâ karye-i mezkûrede sâkin sulbî kebîr oğlu es-Seyyid Süleyman’a ve mezbûre Şerife Âişe Hatun dahi fevt olup yine südüs hisse-i müntakılesi karye-i mezkûrede sâkin sadrî kebîr oğlu es-Seyyid Veliyüddin b. İbrahim’e intikāl eylediğini hâlâ Kassâbân müdîri es-Seyyid Mehmed Ali Bey ile mazbûtü’l-esâmî kasab ustaları ihbâr ettiklerinden sonra gāibûn-ı mezbûrûn es-Seyyid Süleyman ve es-Seyyid Veliyüddin ve Şerife Hafize ve Şerife Ümmügülsüm ve Şerife Hatice hatunlar taraflarından husûs-ı âti’l-beyânda bâ-hüccet-i şer‘iye vekîlleri olduğu zât-ı mezbûrânı ârifân karye-i mezkûre ahâlisinden kasab es-Seyyid Hüseyin Ağa b. Süleyman ve Ali Ağa b. İbrahim nâm kimesneler şehâdetleriyle ber-nehc-i şer‘î sâbit olan mezbûr es-Seyyid Hüseyin meclis-i şer‘-i münîrde Kasablar yazıcısı es-Seyyid el-Hâc Mehmed Haşim Efendi b. es-Seyyid el-Hâc Mehmed Emin muvâcehesinde bi’l-vekâle takrîr-i kelâm edip ben müvekkillerim gāibûn-ı mezbûrûn es-Seyyid Süleyman ve es-Seyyid Veliyüddin ve Şerife Hafize ve Şerife Ümmügülsüm ve Şerife Hatice hatunların nısf gedik-i merkūmdan ber-vech-i muharrer beş südüs hisse-i müntakılelerini bedel-i misli idiği zâhir olan iki bin beş yüz guruş bedel-i makbûz mukābelesinde mezbûr es-Seyyid el-Hâc Mehmed Haşim Efendi’ye bâ-re’y-i mütevellî ferâğ-ı kat‘î-i mu‘teber ile bi’l-vekâle ferâğ ve tefvîz eylediğimde ol dahi ber-vech-i muharrer tefevvüz ve kabûl edip zikr olunan beş südüs hissede müvekkillerim gāibûn-ı mezbûrûn es-Seyyid Süleyman ve es-Seyyid Veliyüddin ve Şerife Hafize ve Şerife Ümmügülsüm ve Şerife Hatice hatunların kat‘a alâka ve medhalleri kalmayıp mezbûr es-Seyyid el-Hâc Mehmed Haşim Efendi’nin hakk-ı müfevvazı olmuşdur deyü ba‘de’l-ikrâr ve’t-tasdîk mezbûr es-Seyyid el-Hâc Mehmed Haşim Efendi meclis-i şer‘-i hatîrde müteveffâ-yı evvel-i mezbûrun oğlu mezbûr es-Seyyid Hüseyin muvâcehesinde [105] ânifen ber-vech-i muharrer sâlifü’z-zikr nısf gedik âlâtından tefevvüz eylediğim beş südüs hisse-i mezkûreyi yine iki bin beş yüz guruş bedel-i makbûza ferâğ-ı mu‘teber-i kat‘î ile bâ-re’y-i mütevellî mezbûr es-Seyyid Hüseyin’e hüsn-i rızâ ve tayyib-i <> hâtırımla ferâğ ve tefvîz eylediğimde ol dahi ber-vech-i muharrer tefevvüz ve kabûl ve hisse-i tevzî‘ini müdîr ve kasab ustaları ma‘rifetleriyle ahz etmek üzere ta‘ahhüd edip fî-mâ ba‘d nısf gedik-i merkūmda benim kat‘a alâka ve medhalim kalmayıp mecmû‘u ber-vech-i muharrer benim ferâğımdan ve babası mezbûr intikālinden merkūm es-Seyyid Hüseyin’in dâhil-i havza-i tasarufu olmuşdur deyü ba‘de’l-ikrâr ve’t-tasdîk âlât-ı mezkûrenin ber-minvâl-i muharrer nısf hissesi mezbûr es-Seyyid el-Hâc Mehmed Haşim Efendi’nin ferâğından ve babası müteveffâ-yı mezbûr Halil Ağa’nın intikālinden defter-i vakf-ı <<şerîfde>> şerîfe mezbûr es-Seyyid Hüseyin’in ismine kayd ve müteveffâ-yı mezbûrun yedinde olan temessüğü zâyi‘ olmağla hisse-i mezkûreyi mezbûr es-Seyyid Hüseyin’in zabt u tasarrufi’çün taraf-ı vakfdan müceddeden bir kıt‘a temessük tahrîr ve temhîr ve yedine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 5 Rebî‘ülâhir sene [12]58