İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 329 Hüküm no: 282 Orijinal metin no: [105-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bogos v. Agob’un Mustafa Ağa’ya olan borcunu ödemesi 10850 [guru]ş hüküm [Ma‘rûz] Âsitâne-i aliyye’de vâki‘ kiremidci esnâfının hâlâ kethudâsı sâhib-i arzuhâl el-Hâc Mustafa Ağa b. Yusuf meclis-i şer‘-i münîrde tuğlacı esnâfının hâlâ kâhyası derûn-ı arzuhâlde mastûrü’l-ism Bogos v. Agop muvâcehesinde mersûm Bogos zimmî zimmetinde cihet-i karzdan on dört bin guruş alacak hakkım olup hattâ meblağ-ı merkūm cihet-i mezkûreden zimmetinde bana deyni olduğu şehr-i sâbıkın on beşinci günü ikrâr ve ber-vech-i meşrûh ikrârını müştemil ve târih-i merkūm ile müverrah Ermeniyyü’l-imlâ işbu bir kıt‘a deyn tahvîlini dahi yedime verdikden sonra üç bin yüz elli guruşunu bana edâ etmekle bâkīsi olan on bin sekiz yüz elli guruşu zimmî-yi mesfûrdan hâlâ taleb ederim deyü da‘vâ ettikde ol dahi cevâbında kaziyye minvâl-i muharrer üzere olduğunu bi-tamamihâ tâyi‘an ve kat‘iyyen ikrâr ü i‘tirâf etmeğin mûcebiyle meblağ-ı bâkī-i merkūm on bin sekiz yüz elli guruşun müdde‘î-i mezbûr el-Hâc Mustafa Ağa’ya edâsıyla mersûm Bogos zimmî ilzâm olunduğu İstanbul Mahkemesi’nden huzûr-ı [âlîlerine i‘lâm olundu] Fî 5 Rebî‘ülâhir sene [12]58